Թուրքիայի առաջարկով Աֆղանստանում կարեւոր միջազգային օդանավակայանի շահագործման եւ անվտանգության ապահովման վերաբերյալ բանակցությունները շարունակվում են։ Այս մասին ասել է պաշտպանության նախարար Հուլուսի Աքարը՝ ավելացնելով, որ Անկարան քննարկում է պլանը մի քանի երկրների հետ, տեղեկացնում է Reuters-ը։
«Պետք է լինեն մի քանի քաղաքական որոշումներ Միավորված Ազգերի Կազմակերպությունում եւ ՆԱՏՕ-ում, եւ պետք է ձեռք բերվի համաձայնություն աֆղանական կառավարության հետ»,- ասել է նա՝ ավելացնելով, որ Թուրքիան հույս ունի ստանալ տարբեր երկրների քաղաքական, ֆինանսական եւ նյութատեխնիկական աջակցությունը։
Նա ընդգծել է, որ վերջնական որոշումը դեռ չի կայացվել, բայց բանակցություններն ԱՄՆ-ի հետ շարունակվում են, եւ պլանը կիրագործվի Թուրքիայի նախագահի հաստատումից հետո։
Ավելի վաղ Թուրքիան առաջարկել էր ապահովել Քաբուլի Համիդ Քարզայի անվան միջազգային օդանավակայանը Աֆղանստանից ԱՄՆ զորքերի դուրսբերումից հետո։
Թուրքիան ավելի քան 500 զինծառայող ունի Աֆղանստանում։ Աքարն ավելի վաղ հայտարարել էր, որ Թուրքիան չի նախատեսում լրացուցիչ զորքեր մտցնել։
«Օդանավակայանը պետք է աշխատի։ Եթե օդանավակայանը չաշխատի, դեսպանությունները կհեռանան, եւ այդ իրավիճակում Աֆղանստանը մեկուսացված պետություն կդառնա»,- ասել է պաշտպանության նախարարը։
Առանց օդանավակայանի վերաբերյալ առանձին համաձայնության՝ ընթացիկ գործողությունները պետք է աջակցվեն ՆԱՏՕ Resolute Support առաքելության շրջանակում։ Քանի դեռ պայմանավորվածություն չկա, պարզ չէ՝ կկարողանա՞ արդյոք ԱՄՆ-ը կամ ՆԱՏՕ-ն հայտարարել Աֆղանստանում իր առաքելությունն ավարտված։
«Մենք հայտարարել ենք մեր մտադրության մասին։ Մենք ասել ենք, որ կարող ենք մնալ, եթե այդ պայմանները կատարվեն»,- ասել է Աքարը։
