BBC-ի ռուսական ծառայությունը նյութ է հրապարակել՝ նվիրված լեգենդար դուդուկահար Ջիվան Գասպարյանին, որում լրատվականի լրագրողները կիսվում են մեծն դուդուկահարի հետ իրենց հանդիպումների տպավորություններով:
Լրագրողներ Ֆամիլ Իսմայլովը եւ Մարկ Գրիգորյանը հիշում են 2000-ականների սկզբին Լոնդոնում կայացած համերգը, երբ Ջիվան Գասպարյանը հանդես էր գալիս ադրբեջանցի կատարող Ալիմ Գասիմովի հետ նույն դահլիճում:
«Բոլորը սպասում էին, որ նրանք միասին բեմ դուրս կգան: Հանդիսատեսը երկար ժամանակ չէր հեռանում», - հիշում է Իսմայլովը:
BBC-ն նշում է, որ Ջիվան Գասպարյանը համագործակցել է այնպիսի հայտնի երաժիշտների հետ, ինչպիսիք են Փիթեր Գաբրիելը, Բրայան Մեյը, Հանս Զիմերը, Բրայան Ինոն, Սթինգը, Սերժ Թանկյանը:
Մարկ Գրիգորյանը նաեւ պատմում է հայ-ադրբեջանական հարաբերությունների մասին Ջիվան Գասպարյանի հետ իր հարցազրույցի մասին, որում վարպետը խոսում էր քաղաքականության մասին.
«Քաղաքականությունը վնասում է մարդկանց, այն սպանում է ժողովրդին: Արվեստի մարդիկ չպետք է կապված լինեն դրա հետ: Եվ ընդհանրապես, ժողովուրդները պետք է սիրեն իրար, ոչ թե սպանեն: Մաֆիայի ներկայացուցիչները ապակողմնորոշում են դժբախտ ժողովուրդներին, նրանց իրար դեմ հանում, իսկ հետո մի կողմ քաշվում եւ հարստանում են մարդկանց հաշվին:
Հետո նա մտածեց ու ավելացրեց.
«Ինչո՞ւ ենք զենք վերցնում մեր ձեռքը, ինչո՞ւ ենք սպանում մարդկանց: Ի վերջո, մենք սիրում ենք աշխարհը, սիրում ենք գեղեցիկ բառեր, երգում ենք, պարում, գինի խմում... Սայաթ-Նովան ասում էր. «Աստված սիրե, հոքի սիրե, յար սիրե»:
92 տարեկան հասակում կյանքից հեռացել է դուդուկի աշխարհահռչակ վարպետ Ջիվան Գասպարյանը: Երաժշտի մահվան մասին հայտնել է նրա թոռը՝ Ջիվան Գասպարյանը կրտսերը:
