Հետազոտողները վերլուծության միջոցով պարզել են, որ 17-րդ դարում Ալյասկայում ճանապարհորդների շները իրենց ուժը պահպանելու համար ոչ միայն ձուկ են կերել, այլ նաեւ՝ իրենց ցեղակիցներին: Ամենայն հավանականությամբ, դա պայմանավորված է եղել սննդի անբավարարությամբ եւ իրենց համար լրացուցիչ սնունդ ստանալու անհրաժեշտությամբ՝ ծանր բեռներով սայլերը տանելու համար։ Այս մասին հայտնում է Planet-Today-ը՝ հղում անելով Proceedings of the Royal Society-ին:
Արկտիկան նվաճողները դեռեւս 2000 տարի առաջ, որպես քարշակային ուժ, օգտագործել են լծկան շների: Մշտական ցրտահարության շնորհիվ այս կենդանիների սառած արտաթորանքները պահպանվել են: Այժմ դրանք կարելի է օգտագործել որպես տեղեկատվության եզակի աղբյուր, որի միջոցով գիտնականները կկարողանան ավելին իմանալ հյուսիսի նվաճման մասին:
Յորքի համալսարանի հետազոտողները վերլուծել են լծկան կենդանիների սառած արտաթորանքը՝ դրանցից սպիտակուցներ հանելով, որպեսզի ավելի շատ տեղեկություններ ստանան արկտիկական շների սննդակարգի մասին: Ուսումնասիրության համար գիտնականներն օգտագործել են Ալյասկայի Քվինհագակի մոտակայքում գտնվող Նունալլեք հնագիտական տեղանքում հավաքված նմուշները: Գիտնականներին հայտնի է, որ մարդիկ այս տարածքը բնակեցրել են 1300-1750 թվականներին:
Սպիտակուցների վերլուծությունը ցույց է տվել, որ շները կերել են սաղմոնի տարբեր տեսակների մկանները, ոսկորները եւ աղիքները: Այնուհետեւ կատարվել է արտաթորանքի մեջ առկա ոսկորների բեկորների անալիզ: Պարզվել է, որ նմուշներից մեկի ոսկորի կտորը պատկանել է մեկ այլ շան: Սա վկայում է այն մասին, որ լծկան շները կերել են իրենց ցեղակիցներին: Այս հայտնագործությունը հաստատվում է նաեւ Արկտիկայում սպանված շների ոսկորների վրա ավելի վաղ հայտնաբերված կրծելու հետքերով:
Գիտնականները եկել են այն եզրակացության, որ չնայած շների սննդակարգում պարունակվել է սաղմոնի մեծ քանակություն, որոշ շներ ստիպված են եղել կաննիբալիզմի դիմել, որպեսզի կուշտ մնան եւ կարողանան լուծն ամբողջ ուժով քաշել:
Յորքի համալսարանի առաջատար հետազոտող Անն Կատրին Վիբորգ Ռունգեն կարծում է, որ «երկար ձմեռների ընթացքում լծկան շներին կերակրել են մարդիկ, սակայն, հավանաբար, ամռանը նրանց ավելի հազվադեպ են կերակրել՝ ձկներին խնայելու համար, կամ շներին պարզապես ազատ են արձակել, որպեսզի նրանք կարողանան իրենց համար սնունդ հայթայթել»:
