Տիգրան Մեծ պողոտայում՝ «Ռոսիա մոլ»–ի դիմաց, տարիներ շարունակ առեւտրով զբաղվողներին քաղաքապետարանից զգուշացրել են տարածքը մաքրել եւ լքել, ինչը առեւտրականներին զայրացրել է։
Տիկին Ալլան, որն այդ տարածքում հագուստ է վաճառում, չի պատրաստվում ենթարկվել պահանջին։
«Բավական է ժողովրդին կոտորեն։ Որ խանութը մտնում ես՝ թանկություն է, չենք կարողանում ապրել։ Ո՞ւմ աչքն ենք հանել, թուրքը մեր աչքն է հանել, ներսում էլ իրե՞նք են մեր աչքը հանում»,– NEWS.am-ի հետ զրույցում վրդովված ասում է տիկին Ալլան։
Նրա խոսքով՝ քաղաքապետարանի ներկայացուցիչները մինչեւ վաղը ժամանակ են տվել տարածքն ազատելու համար։
Հարակից տարածքում ինչ–որ շինություն է կառուցվում։ Տիկին Ալլայի խոսքով ՝ դա նախատեսված է փողոցում առեւտրով զբաղվողների համար, սակայն թե երբ այն շահագործման կհանձնվի եւ ի՞նչ պայմաններով, առեւտրականները չգիտեն։
«Չգիտենք, եթե մեզ բաժին հասնի, ի՞նչ գին կդնեն, ամենակարեւորը հենց դա է»,– ասում է տիկին Ալլան։
Մանրամասները՝ տեսանյութում։
