Մահապարտի ականապատ մեքենան, ուղղվելով կառավարական պահակախմբի վրա, պայթել է Սոմալիի մայրաքաղաքի աշխույժ խաչմերուկում՝ սպանելով առնվազն ութ մարդու, տեղեկացնում է Reuters-ը՝ հղում կատարելով ականատեսներին։
Պահակախումբն ուղեկցում էր քաղաքային ոստկանության պետ, գնդապետ Ֆարհան Կարոլին, որը ողջ է մնացել հարձակումից հետո, տեղեկացրել է կառավարական տեղեկատվական գործակալությունը։
«Ես տեսել եմ ութ դի դեպքի վայրում, ներառյալ մի կնոջ»,- գործակալությանն ասել է եռանիվ տաքսու վարորդ Հասան Սաիդ Ալին, որը դարձել է Մոգադիշոյի Բանադիր խաչմերուկում տեղի ունեցած պայթյունի ականատեսը։
Առայժմ ոչ ոք չի ստանձնել պայթյունի պատասխանատվությունը։ Սակայն իշխանությունները կարծում են, որ դրա հետեւում «Աշ Շաբաբ» ահաբեկչական խմբավորումն է։
