Ես համոզված էի, որ ընտրությունները կեղծված են, ընդ որում տոտալ մասշտաբի: Այս մասին, այսօր՝ հուլիսի 12-ին, NEWS.am-ի հետ զրույցում նշեց «Հայոց հայրենիք» կուսակցության ներկայացուցիչ Արտակ Գալստյանը:
«Ամենահետաքրքիրն այն է, որ առաջին անգամ ընտրությունները կեղծված լինելու մասին խոսել է Նիկոլ Փաշինյանը հունիսի 19-ին իր լայվով՝ համարելով, որ տեղի է ունեցել աննախադեպ քանակի ընտրակաշառքներ եւ ընտրական այլ խախտումներ: Սա միակ դեպքն է, որ ես եւ հանրային իշխանությունը համակարծիք ենք, ուղղակի ես չեմ հասկանում, թե այդ պարագայում, եթե Նիկոլ Փաշինյանը հայտարարում է , որ աննախադեպ քանակի ընտրակաշառքներ կան, ինչու հենց ինքը չի վիճարկում ընտրության արդյունքները:
Նիկոլ Փաշինյանը հայտարարում է, որ մինիմում երկու կուսակցություն աննախադեպ քանակի ընտրակաշառք են բաժանել: Հարուցել են քրգործեր, մարդկանց են կալանավորել: Մյուս կողմն էլ մեղադրում է իրեն վարչական ռեսուրսներ օգտագործելու մեջ: Այսինքն երեք խաղացողներ ներկայացնում են ապացույցներ, որ խայտառակ ընտրություններ են եղել: Առերեւույթ այն ուժերը, որոնք բաժանել են ընտրակաշառք, ասում են՝ հա, ոչինչ, անվավեր ճանաչեք ընտրությունները, իսկ այն ուժը, որ ներկայանում է, որ ինքը սուբ կույս Մարիամն է, ասում է՝ ոչինչ, թող էս կեղտոտ ընտրությունները մնան: Մի քիչ անտրամաբանական է»,-ասաց նա:
Արտակ գալստյանի խոսքով, ընտրախախտումները տեղի են ունեցել ի սկզբանե, օրենքի փոփոխության արդյունքում, պլանավորված եւ համակարգված. «Դա արվել է իշխանության կողմից, որովհետեւ ոչ Ռոբերտ Քոչարյանը, ոչ Սերժ Սարգսյանը, ոչ էլ մյուս կուսակցությունները բարցարձակապես զրկված են եղել այդ լծակներից, որ կարողանային այս մասշտաբի կեղծիք իրականացնել: Իմ սուբյեկտիվ կարծիքով տոտալ կարգի ընտրողների վերահսկողության մեխանիզմ է դրվել: Այսինքն իշխանությունն իմացել է՝ մարդիկ ոնց են քվեարկում եւ հնարավորություն է ունեցել կառավարելու»:
Նշենք, որ ՍԴ-ում ընտրության արդյունքները վիճարկում է 4 քաղաքական ուժ՝ «Հայաստան» եւ Պատիվ ունեմ» դաշինքները, «Հայոց Հայրենիք» եւ «Զարթոնք» կուսակցությունները:
