Իսպանիան ներդնում է 4.3 միլիարդ եվրո էլեկտրամոբիլներ եւ մարտկոցներ արտադրելու համար ծախսերի ազգային ծրագրի շրջանակում, որը ֆինանսավորվում է ԵՄ վերականգնման ֆոնդերի կողմից, հաղորդում է AP¬-ը։

Վարչապետ Պեդրո Սանչեսը հայտարարել է, որ կառավարական ծրագիրը կներառի ամբողջ արտադրական շղթան, ընկերություններին դրամաշնորհների տրամադրումը երկրում մարտկոցների առաջին գործարանը կառուցելու եւ էլեկտրամոբիլների արտադրությունը մեծացնելու նպատակով։

«Իսպանիայի համար կարեւոր է արձագանքել եւ կանխատեսել այդ տրանսֆորմացիան Եվրոպայի ավտոմոբիլային հատվածում»,-ասել է նա՝ հավելելով, որ մասնավոր հատվածը կարող է ներդնել եւս 19.7 միլիարդ եվրո նախաձեռնության մեջ 2021-2023 թվականներին։
Գերմանիայից հետո Իսպանիան մեծությամբ երկրորդն է Եվրոպայում ավտոմոբիլների արտադրության հարցում եւ աշխարհում մեծությամբ ութերորդը։

Այդ ոլորտում Իսպանիան մրցում է Գերմանիայի եւ Ֆրանսիայի հետ, որպեսզի վերանայի մատակարարումների շղթաներն ու վերազինի իր արտադրական բազաները։

Իսպանիայի կառավարության կանխատեսմամբ՝ ծրագիրը կարող է խթանել մինչեւ 140 000 աշխատատեղերի ստեղծումն ու բարձրացնել ազգային տնտեսությունը 1–1,7 տոկոսով։ Այն միտված է, որպեսզի 2023 թվականին նոր էլեկտրամոբիլների թիվը հասնի 250 000-ի, ինչը մեծ առաջընթաց է՝ ի տարբերություն 2020 թվականին գրանցված 18 000 ցուցանշի։