Հայաստանի Սահմանադրական դատարանը շարունակում է քննարկել չորս քաղաքական ուժերի` «Հայաստան» եւ «Պատիվ ունեմ» դաշինքների եւ «Զարթոնք» ու «Հայոց հայրենիք» կուսակցությունների դիմումը, որոնք վիճարկում են արտահերթ ընտրությունների արդյունքների վերաբերյալ ԿԸՀ որոշումը:
Նախորդ չորս օրերի ընթացքում Սահմանադրական դատարանը լսել է չորս քաղաքական ուժերի ներկայացուցիչներին, պատասխանող կողմին` ԿԸՀ-ին, հարակից պատասխանողներին` դատախազության, ոստիկանության, հեռուստատեսության եւ ռադիոյի հանձնաժողովի ներկայացուցիչներին, երրորդ կողմին` «Քաղաքացիական պայմանագիր» կուսակցությանը:
Այսօր նիստը կշարունակվի «ՔՊ» ներկայացուցչին ուղղված հարցերով:
Հուլիսի 13-ի նիստը շարունակվեց այնտեղից, որտեղ ընդհատվել էր երեկ ուշ երեկոյան: Դատավորները «ՔՊ» ներկայացուցիչ Ռուստամ Բադասյանին ուղղված հարցեր չունեին: «Հայաստան» դաշինքի ներկայացուցիչ Արամ Վարդեւանյանը եւս հարցեր չուներ: «Զարթոնք» կուսակցության ներկայացուցիչ Արա Զոհրաբյանը պարզաբանող հարցեր տվեց ընտրողների ցուցակների եւ նույնականացման վերաբերյալ: «Ձեր քաղաքական ուժը միշտ բողոքել է խախտումներից: Երբ իշխանության եկաք, խոստացաք շտկել իրավիճակը: Այժմ մենք բողոքարկում ենք ընտրությունների արդյունքները եւ ցանկանում ենք իմանալ՝ արդյո՞ք շտկվել է այն, ինչից դուք նախկինում բողոքում էիք», - նկատել է Զոհրաբյանը: Բադասյանը խոստովանեց, որ ծրագրված ամեն բան չի հաջողվել իրականացնել՝ հաշվի առնելով համավարակն ու պատերազմը: «Խնդիրները չեն լուծվել, համակարգը չի բարելավվել», - եզրափակեց Զոհրաբյանը:
