Ես բավականին համեստ սպասումներ ունեմ Սահմանադրական դատարանում ընդդիմադիր կուսակցությունների բողոքների քննությունից: Այս մասին NEWS.am կայքի TALK TIME ծրագրի եթերում ասաց հանրապետության առաջին օմբուդսմեն Լարիսա Ալավերդյանը:
Նրա խոսքով՝ գրեթե բոլոր Սահմանադրական դատարաններին, ինչպես նաեւ Եվրոպական դատարանին հաջողվում է որոշումներ կայացնել, որոնք մեկնաբանման լայն դաշտ են թողնում՝ հօգուտ այս կամ այն կողմի: «Եվ դրա համար անհրաժեշտ է որոշակի հմտություն ունենալ: Այնպես չէ, որ դա հեշտ է»,- ասաց Ալավերդյանը:
Ընդ որում, նա բավականին բարձր գնահատեց նման գործընթացի առկայությունը, քանի որ, ըստ նախկին օմբուդսմենի, դա որոշակի հետք եւ ազդեցություն կթողնի հետագա իրադարձությունների վրա:
Ալավերդյանն անդրադարձավ նաեւ հունիսի 20-ին Հայաստանում անցկացված արտահերթ խորհրդարանական ընտրությունների արդյունքները կեղծելու գործում Կենտրոնական ընտրական հանձնաժողովի ղեկավար Տիգրան Մուկուչյանի հնարավոր դերին: Նրա կարծիքով՝ Մուկուչյանը չէր կարող ուղղակիորեն մասնակցել քվեների կեղծման գործընթացին, բայց հենց նա է, ըստ էության, պաշտպանում ներկայիս իշխանությունների դիրքորոշումն ու շահերը:
