Սարսափելի է, որ մարդիկ, ովքեր իրարամերժ, երբեմն շատ զվարճալի հայտարարություններով են հանդես գալիս, ղեկավարելու են երկիրը: Այս մասին NEWS.am կայքի TALK TIME ծրագրի եթերում ասաց հանրապետության առաջին օմբուդսմեն Լարիսա Ալավերդյանը:
Խոսքը, ըստ նրա, կոնկրետ մարդկանց մասին է, ովքեր որոշակի դիրքորոշում ունեն եւ, անկախ իրավիճակից, չեն փոխի իրենց մոտեցումները: «Հայաստանի համար ամենամեծ վտանգը դա է: Գործընթացը, որը հիմա տեղի է ունենում Սահմանադրական դատարանում, վաղ թե ուշ կավարտվի, բայց գործող կառավարության քաղաքականությունը կմնա անփոփոխ»,- պարզաբանեց Ալավերդյանը:
Նա, մասնավորապես, օրինակ բերեց՝ համեմատելով Ֆրանսիայի նախագահին Հայաստանի վարչապետի պաշտոնակատար Նիկոլ Փաշինյանի հետ: Այդպես, ըստ նրա, եթե Ֆրանսիայի ղեկավարը ժողովրդի հետ խոսեր մուրճով, այն էլ՝ նման հայտարարություններով, որոնք նախկինում հնչեցվել են Փաշինյանի կողմից, սա խիստ քննադատություն կառաջացներ ֆրանսիացիների շրջանում:
«Հարց կառաջանար՝ արդյո՞ք այս ամենից հետո նրան կհաջողվի մնալ իշխանության գլուխ: Չնայած այստեղ ամեն ինչ ակնհայտ է՝ չէր մնա: Հայաստանի դեպքում ոչ ոք ոչինչ չի ասում»,- ասաց իրավապաշտպանը՝ համեմատելով Փաշինյանին Ադոլֆ Հիտլերի հետ, ով կարողացավ գերմանական հասարակությանը համոզել, որ իր կարծիքն ամբողջ ժողովրդի կարծիքն է: Այնուամենայնիվ, Փաշինյանին, նրա կարծիքով, ամենայն հավանականությամբ, շատ բան կներեն: