Ընտրությունների արդյունքները չեն արտացոլում ժողովրդի կամքը: Այս մասին այսօր՝ հուլիսի 14-ին, ՍԴ նիստում՝ ելույթ ունենալով եզրափակիչ խոսքով, ասաց «Հայաստան» դաշինքի ներկայացուցիչ Արամ Վարդեւանյանը:
Նա հիշեցրեց, որ ի տարբերություն այլ դատերի՝ ՍԴ-ն միակ դատարանն է, որը կարող է պարզել ընտրությունների ողջ կոնտեքստը: Վարդեւանյանն ընդգծեց, որ այնպես է ստացվել, որ այդ կոնտեքստում սկզբունքային դեր է ունեցել 2020 թվականի նոյեմբերի 9-ի փաստաթուղթը, որը ենթադրում է հազարավոր զոհեր, հայրենիքի կորուստ, բարդ ներքաղաքական իրավիճակ:
«Հայաստանի Հանրապետությունում նոյեմբերի 9-ից անվտանգ չէ: Քաղաքացիներն անվտանգության մեջ չեն: Մեր սահմաններն անձեռնմխելի չեն: Դեռ հետաքննվում է այդ գործը, եւ մենք հասկանում ենք, որ թշնամին կարող է ներթափանցել մեր սահմաններ: Կոնտեքստի բացահայտման գործում կարեւոր են հետեւանքները: Իսկ դրանք հետեւյալն են. վարչապետը փաստացի վերածվել է միանձնյա կառավարչի, ով յուրացրել է նույնիսկ նախագահի լիազորությունները»,-նշեց Վարդեւանյանը:
Նա հիշեցրեց, որ դիմումի մեջ նշված է այդ հանգամանքը , եւ այն չի մերժվել: Նրա խոսքով՝ դա կարող էր տեղի ունենալ նաեւ ճնշման ներքո, իսկ որպես օրինակ նշեց այն փաստը, որ երբ նախագահը վերադարձրեց վարչապետի՝ բարձրաստիճան զինվորականին հեռացնելու մասին որոշումը, նրան սպառնացին իմփիչմենթով:
«Այդ պայմաններում միամտություն է ճնշման բացակայության մասին խոսելը»,-նկատեց Վարդեւանյանը:
Նա անդրադարձավ վարչական ռեսուրսի չարաշահմանը, ինչը խախտել է ընտրություններում հավասարության սկզբունքը:
«Շատ է խոսվում այն մասին, թե արդյոք վարչապետը կարող էր հրաժարականից հետո մնալ պաշտոնակատար: Ինչո՞ւ հրաժարականից հետո որոշեց շարունակել»,-նշեց նա:
Խոսելով իշխանության հետեւողականության մասին՝ նա հիշեցրեց, որ նման նախադեպ եղել է 1998 թվականին, երբ հրաժարական տվեց առաջին նախագահը: «Դա նշանակում էր հրաժարական, ինչպես ցանկացած նորմալ երկրում: Այստեղ այլ բան տեղի ունեցավ՝ վարչական ռեսուրսի կիրառմամբ»,-շարունակեց իրավաբանը:
Նրա խոսքով՝ ՍԴ-ում հնարավորություն չի եղել ներկայացնել պարգեւավճարների ողջ ծավալը, սակայն խոսքը միլիարդների մասին է, որոնք վճարվել են մայիսի 10-ից հետո, ակնհայտ է, որ այստեղ պատահականություն չկա: Միեւնույն ժամանակ, դաշինքի անդամների նկատմամբ ճնշման մեխանիզմներ են գործադրվել, հարյուրավոր մարդիկ բերման են ենթարկվել: Կան քրեական գործեր, սակայն չկան մեղադրյալներ: Իրավապահ համակարգը անկախ չէ, նշեց Վարդեւանյանը:
Նրա խոսքով՝ ագրեսիվ հռետորաբանությունը դաշինքի գնահատականը չէ, այլ իրավաբանական փաստ, որը հաստատում է վարչական դատարանը: Ոստիկանության պահվածքը եւս խոսում է շատ բանի մասին, երբ ամբողջ Երեւանում «Հայաստան» դաշինքի դեմ թերթիկներ էին, իսկ ոստիկանությունը տեսել է միայն 10-20-ը մի փողոցում:
Դատարանում հնչեցրած հարցին, թե այս եւ 2018 թվականի ընտրություններին մասնակցել է 300 հազարով քիչ ընտրող, Վարդեւանյանն ունի պատասխան. ընտրողը ագրեսիվ ճնշման ներքո, ասֆալտին փռելու, ձեռքերը կտրելու եւ նման խոստումների ներքո կարող էր չմասնակցել ընտրություններին:
«Այս ընտրությունների արդյունքները չեն արտացոլում ժողովրդի կամքը»,-նշեց նա:
«Երեք տարի իշխում է մի ուժ: Հայաստանի Սահմանադրությունը դրա մասին չէ: Անկախության մասին հռչակագիրը նույնպես դրա մասին չէ»,-հավելեց Վարդեւանյանը:
Նա ընդգծեց, որ ՍԴ-ն կարող է փոխել իրավիճակը: «Մենք նաեւ այսօր լուրջ մարտահրավերների առջեւ ենք կանգնած: ՍԴ-ն բացառիկ լիազորություն ունի՝ կանխելու նոր աղետները, նոր զիջումները, անբացատրելի փաստաթղթերն ու գործողությունները: Սա ընտրությունների արդյունքների մասին վեճ չէ: Ընտրությունների արդյունքները չեն արտացոլում ժողովրդի կամքը: Պատկերը, որը մենք տեսնում ենք ԿԸՀ որոշման մեջ, խեղաթյուրված է»,-ասաց Վարդեւանյանը՝ օրինակ բերելով Ջեմմա Մարտիրոսյանին, ում ստորագրությունը հայտնվել էր քվեարկածների ցուցակում՝ չնայած նա բացակայում է երկրից: «Դատախազները փորձում էին վստահեցնել, որ դա պատահականություն է: Սակայն քանի՞ հազարավոր նման պատահականություններ են եղել»,-հարց ուղղեց Վարդեւանյանը: