ԱԺ արտահերթ ընտրություններին ոստիկանությունը գործել է բացառապես օրենքով իրեն վերապահված լիազորությունների շրջանակում: Այս մասին, այսօր՝ հուլիսի 14-ին, ՍԴ-ում ընտրությունների արդյունքների վիճարկման հարցով քննության ժամանակ իր ամփոփիչ խոսքում նշեց հարակից պատասխանող փոխոստիկանապետ Արա Ֆիդանյանը:
Անդրադառնալով 2018 եւ 2021 թվականներին ընտրացուցակներում ընդգրկված անձանց տարբերությանը, նա նշեց. «2021 թվականի ԱԺ ընտրությունների ցուցակները նոր չեն ձեւավորվել, դրանք նույն 2018-ի ցուցակներն են, որոնք բնական էվոլյուցիայի եւ փոփոխությունների են ենթարկվել: Պարոն Վարդեւանյանը նշել էր, որ 2021 թվականի ցուցակներում առկա է 116 նոր անձանց տվյալ: Այդ տարբերությունը ըստ պետռեգիստրում առկա տեղեկատվության կազմում է ոչ թե 116 հազար, այլ 123 հազար 235 անձ, որոնցից 67 հազար 180 ընտրող ցուցակում ընդգրկվել է 18 տարին լրանալու կապակցությամբ, 28 հազար 254 ընտրող ժամկետային զինծառայությունից վերադառնալու եւ ըստ բնակության վայրի հաշվառվելու կապակցությամբ: 6 642 ընտրող ՀՀ քաղաքացություն ձեռք բերելու կապակցությամբ, 1038 ընտրող վերադարձել է ազատազրկման վայրերից եւ հաշվառվել է բնակության վայրում: Բացի դրանից, ցուցակում ավելացել են նաեւ այն քաղաքացիների տվյալները, որոնք կազմում են 20 121, որոնք 2018-ի ընտրությունների ժամանակ չեն ունեցել հաշվառում եւ մինչեւ 2021-ի հունիսի 13-ը հաշվառվել են որեւէ հասցեում:
123 հազար 235 անձանցից բացի, եւս 17 հազար 812 քաղաքացի էլ կատարել է անհատական տվյալների փոփոխություն»: