Նախագահ Ջո Բայդենը Սպիտակ տանը հյուրընկալում է Գերմանիայի կանցլեր Անգելա Մերկելին՝ Ռուսաստանի եւ Չինաստանի շուրջ տարաձայնությունները քննարկելու համար, քանի որ երկու առաջնորդները ձգտում են ամրապնդել հարաբերությունները, որոնք տուժել են նախկին նախագահ Դոնալդ Թրամփի օրոք, հաղորդել է Reuters-ը:
ԱՄՆ-ը եւ Գերմանիան ՆԱՏՕ-ի գլխավոր դաշնակիցներն են: Բայդենը եւ Մերկելը միմյանց ճանաչել եւ միասին աշխատել են երկար տարիներ: Սակայն նրանց կառավարությունները տարաձայնություններ ունեն մի շարք լուրջ հարցերի՝ այդ թվում Բալթիկ ծովի հատակով Ռուսաստանից Գերմանիա «Հյուսիսային հոսք 2» գազատարի կառուցման շուրջ, որը, ըստ Վաշինգտոնի, կվնասի Ուկրաինային եւ կմեծացնի Եվրոպայի կախվածությունը ռուսական գազից:
Նրանք նաեւ համաձայն չեն Չինաստանի հետ գործարար նախագծերի շուրջ գործընկերության նպատակահարմարության, Եվրոպայից Միացյալ Նահանգներ ճանապարհորդության սահմանափակումների եւ արտոնագրերից ժամանակավոր հրաժարման՝ Գերմանիայի հակազդեցության հետ՝ ուղղված COVID-19-ի պատվաստանյութերի արտադրության արագացմանը:
78-ամյա Բայդենը եւ 66-ամյա Մերկելը, սակայն, համակարծիք են մի շարք ավելի լայն հարցերի շուրջ՝ երկուսն էլ ցանկանում են ամրապնդել անդրատլանտյան հարաբերությունները, որոնք տուժել են Թրամփի հաճախակի եւ կոշտ քննադատությունից ԱՄՆ-ի մերձավոր դաշնակիցների հասցեին:
«ԱՄՆ-ի եւ Գերմանիայի միջեւ համագործակցությունը ամուր է, եւ մենք մտադիր ենք շարունակել այն: Վստահ եմ, որ այդպես էլ կլինի», - ասել է Բայդենը Օվալաձեւ կաբինետում հանդիպման մեկնարկի ժամանակ: «Ես բարձր եմ գնահատում այս բարեկամությունը», - ասել է Մերկելը` ընդգծելով Միացյալ Նահանգների դերը ազատ եւ ժողովրդավարական Գերմանիա կառուցելու գործում:
