Աշխարհի ամենահարուստ մարդը՝ Ջեֆ Բեզոսը, տիեզերքից տեսանյութ է հրապարակել:
Բեզոսը դեպի տիեզերք 11 րոպեանոց թռիչք է իրականացրել եւ վերադարձել New Shepard տիեզերանավով, որը հասել է 107 կիլոմետր բարձրության, ինչը թույլ է տվել ուղեւորներին անկշռելիություն զգալ՝ հիանալով Երկրի կորով: Բեզոսը տեղադրել է տեսանյութ, որում թիմի անդամներն անկշռելիության մեջ են:
Վերադառնալուց հետո կայացած մամուլի ասուլիսում Բեզոսը շնորհակալություն է հայտնել Amazon-ի բոլոր աշխատակիցներին եւ հաճախորդներին՝ Blue Origin-ի չվերթը ֆինանսավորելու համար:
«Ես նաեւ ուզում եմ շնորհակալություն հայտնել Amazon-ի յուրաքանչյուր աշխատակցի եւ յուրաքանչյուր հաճախորդի, քանի որ դուք, տղաներ, վճարել եք այդ ամենի համար: Ի սրտե շատ շնորհակալ եմ»,- ասել է Բեզոսը:
Երբ նրան հարցրել են, թե արդյոք նորից կթռչի, Բեզոսը պատասխանել է. «Սատանան տանի, այո: Որքա՞ն արագ կարող ես լիցքավորել այս սարքը: Թռանք»:
MSNBC News-ին տված հարցազրույցում Բեզոսն ասել է, որ իրենց տիեզերական թռիչքը մեծ նշանակություն ունի ապագա սերունդների տիեզերական ճանապարհորդությունների ուղին հարթելու համար: Նա նաեւ նշել է, որ սա հիշեցում է Երկիր մոլորակի փխրունության մասին: «Մենք պետք է ճանապարհ բացենք դեպի տիեզերք, որպեսզի մեր երեխաներն ու նրանց երեխաները կարողանան կերտել ապագան... Մեզ պետք է շրջակա միջավայրը աղտոտող արդյունաբերությունը տանել տիեզերք եւ փրկել Երկիրը»,- ասել է Բեզոսը: «Դա կպահանջի տասնամյակներ եւ տասնամյակներ, բայց պետք է սկսել»,- հավելել է նա: