Առնվազն 18 մարդ զոհվել է հնդկական արեւմտյան Մահարաշթրա նահանգում հորդառատ մուսոնային անձրեւներից հետո, որոնք առաջ են բերել սողանքներ եւ հեղեղումներ ու ջրի տակ թողել ցածրադիր շրջանները, տեղեկացնում է Reuters-ը։

Գետերը Մահարաշթրայում դուրս են եկել ափերից այն բանից հետո, երբ իշխանությունները ջուրը բաց են թողել ամբարտակների ջրերը, որոնք լիքը լցված էին, քանի որ արեւմտյան ափի շատ մասերում 24 ժամում ավելի քան 200 մմ անձրեւ էր եկել, իսկ որոշ մասերում՝ 594 մմ։

Նահանգի կառավարության ներկայացուցչի խոսքով՝ առնվազն չորս մարդ զոհվել է Մումբայում շենքի փլուզումից, եւս 14 մարդ զոհվել է Մահարաշթրայի այլ հատվածներում սողանքների պատճառով։

Պաշտոնյայի խոսքով՝ մտահոգություն կա, որ մի քանի տասնյակ մարդ հայտնվել է ծուղակում Սատարա եւ Ռայգադ շրջաններում։

Մահարաշթրայի գլխավոր նախարար Ուդհավ Թեքերեյի խոսքով՝ ափամերձ շրջաններում հնդկական նավատորմը եւ բանակը օգնում են փրկարար գործողություններին։

Հազարավոր բեռնատարներ կանգնած են մնացել ազգային ավտոմայրուղում, որը Մումբայը կապում է հարավային Բանգալոր տեխնոլոգիական կենտրոնի հետ, ընդ որում՝ ճանապարհը որոշ հատվածներում ջրի տակ է անցել։

Հարյուրավոր գյուղեր եւ տասնյակ քաղաքներ Մահարաշթրայի տուժած շրջաններում մնացել են առանց էլեկտրականության եւ խմելու ջրի։