Պաշտպանության եւ անվտանգության աֆղանական ազգային ուժերը (ՊԱԱԱՈւ) ձերբակալել են «Թալիբան» արմատական շարժման մի քանի հրամանատարների հակաահաբեկչական գործողությունների ընթացքում։ Այս մասին երկուշաբթի տեղեկացրել է երկրի ՆԳՆ-ն իր կայքում, հաղորդում է ՏԱՍՍ-ը։
Գործողություններն իրականացվել են խճուղում, որը միացնում է Քաբուլ եւ Գոր նահանգները (մայրաքաղաքից արեւմուտք)։ Թալիբների ձերբակալված հրամանատարների մեջ է Մոհամադ Ջանը, որը ավտոճանապարհի, սաբոտաժի եւ ճանապարհին վրա հարձակումների կազմակերպման վերահսկողության պատասխանատուն է։ «Թալիբանի» եւս մի քանի անդամներ չեզոքացվել են։
Բացի այդ, ուժայինները թալիբներից ազատագրել են մի քանի գյուղեր, որոնք գտնվում են Գոր-Քաբուլ խճուղու երկայնքին։ Վնասազերծվել են հինգ հակատանկային ականներ, որոնք արմատականները տեղադրել էին այդ ավտոճանապարհին։
Ապրիլի 14-ին ԱՄՆ նախագահ Ջո Բայդենը հայտարարեց Աֆղանստանում գործողությունն ավարտելու իր որոշման մասին, գործողություն, որն ամենաերկարատեւ օտարերկրյա ռազմական կամպանիան էր ամերիկյան պատմության մեջ։ Այս ֆոնին իսլամական հանրապետությունում նկատվում է իրավիճակի վատթարացում անվտանգության ոլորտում՝ կապված այն բանի հետ, որ «Թալիբան» շարժման գրոհայիններն ավելացնում են հարձակման տեմպերը մի շարք ուղղություններում։ Շարժման ներկայացուցիչների պնդումների համաձայն՝ թալիբները կարողացել են վերահսկողություն սահմանել երկրի տարածքի մոտ 85 տոկոսի վրա, ներառյալ հինգ երկրների (Իրան, Չինաստան, Պակիստան, Տաջիկստան, Թուրքմենստան) սահմանի երկայնքին գտնվող շրջանները։
