Որպես բժիշկ հանդերձավորված ավազակները COVID-19-ի դեպքերի հայտնաբերման պատրվակով թափանցել են Հոնդուրասում հայտնի կին քաղաքական գործիչ Քարոլինա Էչեվերիայի տուն եւ սպանել նրան, տեղեկացնում է ՌԻԱ «Նովոստի»-ն՝ հղում կատարելով Tiempo թերթին։
Ինչպես տեղեկացրել են ոստիկանությունում, կիրակի երեկոյան երկրի մայրաքաղաք Տեգուսիգալպայում Էչեվերիայի տուն եկել է մարդկանց մի խումբ՝ մեկ կին եւ չորս տղամարդ։ Նրանք հարցրել են, թե արդյոք տանը COVID-19-ով հիվանդներ կան։ Ներս մտնելով՝ նրանք կրակ են բացել տանտիրուհու եւ նրա ամուսնու վրա։ Նշվում է, որ ավազակները հագած են եղել բուժաշխատողների վարդագույն համազգեստներ։ Էչեվերիան սպանվել է, նրա ամուսինը՝ ոստիկանության պաշտոնաթող գնդապետ, ծանր վիրավորվել է։
Ոստիկաններին արդեն հաջողվել է կալանավորել կասկածյալներից մեկին։ Ենթադրվում է, որ նախկին պատգամավորի դեմ հարձակման մոտիվը թալանի փորձն էր։
Քարոլինա Էչեվերիան Լիբերալ կուսակցության նշանավոր ղեկավարներից մեկն էր, որը 2006-2010թթ. մտնում էր Ազգային կոնգրեսի (խորհրդարան) կազմի մեջ։ 2016թ. նա առաջադրվել է որպես նախագահի թեկնածու, բայց չի գրանցվել։