ԱՄՆ-ում երեկույթի մասնակիցները աղյուսներով սպանել են զինված տղամարդուն, որը կրակ էր բացել հավաքվածների վրա, տեղեկացնում է NBC հեռուստաալիքը՝ հղում կատարելով ոստիկանությանը։
Միջադեպը տեղի է ունեցել երկուշաբթի օրը Տեխասի Ֆորտ Ուերտ քաղաքում։ Ոստիկանության տվյալներով՝ երեկույթի ժամանակ վեճ է սկսվել, ինչից հետո մասնակիցներից մեկը կրակ է բացել եւ վիրավորել մեկ մարդու։ Հյուրերը սկսել են հետապնդել կրակողին, տեղեկացնում է ՌԻԱ «Նովոստի»-ն։
Իչպես տեղեկացնում է հեռուստաալիքը, հետապնդման ժամանակ զինված տղամարդը կրակ է բացել իր հետեւից վազող մարդկանց վրա, առնվազն երկու մարդ վիրավորվել է, ավելի ուշ նրանցից մեկը մահացել է։ Հետապնդողները աղյուսներ են նետել փախչողի հետեւից։ Երբ հաջողվել է կանգնեցնել նրան, տղամարդուն մի քանի հարված են հասցրել առնվազն մեկ աղյուսով, ինչի հետեւանքով ստացած վնասվածքներից նա տեղում մահացել է։
Ավելի ուշ բուժհաստատություններ է հասցվել երեք տուժած թեթեւ վիրավորումներով, նրանց կյանքին ոչինչ չի սպառնում։ Ոստիկանությունը հետաքննում է կատարվածի հանգամանքները։