Ամերիկյան Twitter ընկերությունը ժամանակավորապես փակում է Սան Ֆրանցիսկոյի եւ Նյու Յորքի  կենտրոնակայանը կորոնավիրուսի «դելտա» շտամի տարածման պատճառով, տեղեկացնում է Forbes պարբերականը՝ հղում կատարելով սոցիալական ցանցի ներկայացուցչին, հաղորդում է ՌԻԱ «Նովոստի»-ն։

Ինչպես տեղեկացնում է ամսագիրը, երկու շաբաթ առաջ Twitter-ը թույլ էր տվել իր աշխատակիցներին դուրս գալ հեռահար աշխատանքից եւ գալ գրասենյակներ։

Twitter-ի ներկայացուցչի խոսքով՝ բացի կենտրոնակայանի եւ գրասենյակների փակումից, ընկերությունը «դադարեցնում է գրասենյակների բացումը»։

Ավելի վաղ տեղեկացվել էր, որ դիմակներ կրելը կդառնա պարտադիր ԱՄՆ որոշ գերատեսչություններում, հատկապես Ներկայացուցիչների պալատում եւ ներքին անվտանգության նախարարությունում կորոնավիրուսի «դելտա» շտամի տարածման պատճառով։ Դիմակներին վերադառնալու հայտարարությանը նախորդել էր CDC հանձնարարականը, որի համաձայն՝ պատվաստված մարդիկ պետք է դիմակ կրեն բարձր ռիսկի գոտիներում։

Ամերիկյան Twitter Inc. ընկերությունը հիմնադրվել է 2006թ.։ Հիմնական արտադրանքը սոցիալական ցանցն է կարճ հաղորդագրությունների փոխանակման համար։ Կենտրոնակայանը գտնվում է Սան Ֆրանցիսկոյում (Կալիֆոռնիա նահանգ)։