Լիբանանի խորհրդարանի խոսնակ Նաբիհ Բերին հայտարարել է, որ երկրի օրենսդիր մարմինը պատրաստ է հանել պատգամավորներից անձեռնմխելիությունը, որպեսզի նրանք կարողանան հարցաքննվել անցած օգոստոսին Բեյրութի նավահանգստում տեղի ունեցած պայթյունի կապակցությամբ, հայտնում է Reuters-ը:
Հզոր պայթյունի հետեւանքով զոհվել էր ավելի քան 200 մարդ, հազարավորները վիրավորվել էին, քաղաքի մի մասն էլ՝ ավերվել: Այնուամենայնիվ, գրեթե մեկ տարի անց բարձրաստիճան պաշտոնյաներից ոչ ոք չի հարցաքննվել աղետի կապակցությամբ, ինչը զայրացրել էր լիբանանցիներից շատերին:
«Խորհրդարանի առաջնահերթությունը եղել է եւ կլինի դատական իշխանության հետ լիարժեք համագործակցությունը»,- ասված է Բերիի հայտարարության մեջ՝ խորհրդարանում հիմնական սուննիական դաշինքի՝ Ապագայի շարժման հետ հանդիպումից հետո:
Սաադ ալ Հարիրին, ով ղեկավարում է կուսակցությունը, այս շաբաթվա սկզբին կոչ էր արել հանել օրենսդիրներից անձեռնմխելիությունը: Բերին, սակայն, չի հայտնել, թե երբ կամ ինչպես է դա արվելու: