Ռոստովի հին օդանավակայանի տարածքում տոնավաճառում, որտեղ աշխատում են Աքսայի շրջանում նախկինում փակված Բանջարեղենի շուկայի առեւտրականները, զանգվածային ծեծկռտուք է տեղի ունեցել հարյուր մարդու մասնակցությամբ: Այս մասին հայտնում է Տարածաշրջանային զարգացման կորպորացիայի մամուլի ծառայությունը՝ վկայակոչելով «Դոնսկայա տոռգովայա կոմպանիա» ԲԲԸ հարթակի կազմակերպչին:
Հաղորդագրության տեքստում ասվում է, որ հակամարտությունը տեղի է ունեցել ժամը 3:00-ի սահմաններում: Բանջարեղենով ավտոմեքենաներից մեկը զբաղեցրել էր այն տեղը, որտեղ կանգնած էին հատապտուղ վաճառող ձեռնարկատերերի ավտոմեքենաները, ինչը «դժգոհություն էր առաջացրել արդեն այնտեղ գտնվող վաճառողների շրջանում»:
«Կողմերից յուրաքանչյուրը հարաբերություններ պարզելու համար ընդհանուր մոտ հարյուր մարդ էր կանչել: Ծեծկռտուք է տեղի ունեցել: Շուկայի անվտանգությունը չէր կարողացավ ինքնուրույն կանգնեցնել հակամարտող կողմերին»,- ասված է հաղորդագրության մեջ:
Միայն դրանից հետո դեպքի վայր էին ժամանել ոստիկանության աշխատակիցներն ու Ազգային գվարդիայի խումբը:
Ինչպես «ՌԲԿ Ռոստով»-ին հայտնել են Ռոստովի մարզում Ռուսաստանի ներքին գործերի նախարարության գլխավոր տնօրինության մամուլի ծառայությունում, ծեծկռտուքի բոլոր մասնակիցները հարցաքննվել են: Այժմ ոստիկանությունը պարզում է միջադեպի հանգամանքները:
Ավելի վաղ «ՌԲԿ Ռոստով»-ը հայտնել էր, որ ընթացիկ տարվա ապրիլի վերջից հին Ռոստովի օդանավակայանի տարածքում 800 տեղով բանջարեղենի առեւտրի հարթակ է գործում, որը Քարիմ Բաբաեւի, նրա որդիների եւ Աքսայի շրջանի նախկին ղեկավար Վիտալի Բորզենկոյի կազմակերպված հանցավոր խմբի գործի կապակցությամբ ժամանակավորապես տեղափոխվել էր Աքսայի շրջանի շուկայի տարածքից: Առեւտրային հարթակի կազմակերպիչն էր Ռոստովի մարզի տարածաշրջանային զարգացման կորպորացիան եւ, մասնավորապես, դրա դուստր ձեռնարկությունը՝ «Դոնսկայա տոռգովայա կոմպանիա» ԲԲԸ-ն:
Հունիսի վերջին Աքսայի շրջանային դատարանն արգելել է աշխատանքը բանջարեղենի շուկայում: Որոշումը կայացվել է դատախազի միջնորդությամբ, որը խնդրել էր արգելել առեւտուրը մինչեւ «դաշնային օրենքի խախտումների վերացումը»:
