Անտառային հրդեհը Կալիֆոռնիայի նահանգում, որն ստացել է «Դիքսի» անվանումը, անբարենպաստ եղանակային պայմանների պատճառով տարածվում է մեծ արագությամբ եւ արդեն ընդգրկել է 112 հազար հեկտար մակերես։ Այս մասին չորեքշաբթի տեղեկացրել է նահանգի հրշեջ գերատեսչությունը։
Ծառայության տվյալներով՝ ներկա պահին հաջողվել է վերահսկողության տակ վերցնել հրդեհի մակերեսի ընդամենը 35 տոկոսը, ընդ որում՝ հուլիսի վերջից այն ավելացել է գրեթե երեք անգամ։ Նահանգում այս տարվա ընթացքում գրանցվել է անտառային հրդեհների ավելի քան 6 հազար օջախ, կրակը ոչնչացրել է 234,5 հազար հեկտար անտառ եւ 400 շենք։
Ինչպես տեղեկացնում է The Mercury News թերթը, շոգի, քամու պոռթկումների եւ 10 տոկոսից պակաս խոնավության պատճառով գրեթե անհնար է կանխատեսել կրակի տարածման տեմպերը, որն արդեն մոտենում է հանրահայտ հանգստավայրերին, մասնավորապես՝ Ալմանոր լճին։ «Իսկապես չեմ հասկանում, թե սա ինչի կվերածվի մի քանի օր հետո։ Այս հրդեհը պարզապես հսկայական է»,- պարբերականը մեջբերում է հրշեջների ներկայացուցիչ Ռիկ Քարհարթի խոսքերը։
Սպասվում է, որ առաջիկա օրերին հրդեհի ծուխը կհասնի Սան Ֆրանցիսկո՝ նահանգի խոշոր քաղաքներից մեկը։ Տեղի իշխանությունները պատրաստվում են նախազգուշացնել օդի որակի լուրջ վատացման մասին։
Կրակի դեմ պայքարում գործի են դրվել 5 հազար հրշեջներ։ Օդերեւութաբանների կանխատեսումներով՝ քամին կարող է փոքր-ինչ հանդարտվել ուրբաթ։