Ռուսաստանը միշտ հատուկ ուշադրություն է դարձրել Լեռնային Ղարաբաղի եւ հարակից շրջանների մշակութային եւ պատմական ժառանգության խնդիրներին: Բոլորը դա գիտեն: Այս մասին ասաց ԱԳՆ տեղեկատվության եւ մամուլի վարչության փոխտնօրեն Ալեքսանդր Բիկանտովը՝ պատասխանելով այն հարցին, թե ինչպես է Ռուսաստանի Դաշնությունը գնահատում ադրբեջանական կողմի գործողությունները, որոնք մի քանի ամիս է, ինչ խանգարում են հայ հոգեւորականներին մուտք գործել Դադիվանքի վանք:
«Համոզված ենք, որ սա հումանիտար կարեւոր թեմա է, որը մենք պարբերաբար բարձրացնում ենք ինչպես Բաքվի, այնպես էլ Երեւանի պաշտոնյաների հետ շփումների ժամանակ: Ռուս խաղաղապահներն ուղեկցում են ուխտավորների խմբերին, ովքեր այցելում են Դադիվանք, Ամարաս եւ Գանձասար վանքեր: Մենք վճռականորեն աջակցում ենք տարածաշրջանում ՅՈւՆԵՍԿՕ-ի առաքելության վաղ կազմակերպմանը, որը կարող է տեղում գնահատել գործերի վիճակը: Խնդիրը ԵԱՀԿ Մինսկի խմբի համանախագահների տեսադաշտում է»,- ասաց նա:
Ինչպես արդեն հաղորդվել էր, Ադրբեջանն արդեն երեք ամիս է, ինչ արգելում է հայ քահանաներին մուտք գործել Դադիվանք (12-13 -րդ դարերի հայկական վանք, որը ադրբեջանական իշխանությունները քարոզչական նպատակներով առանց որեւէ պատմական հիմնավորման որպես ալբանական տաճար էին ներկայացնում - խմբ.): Նրանց նույնիսկ արգելված է մուտք գործել վանական համալիրի տարածք: Դադիվանքը նաեւ զրկվել է իր ուխտավորներից. Ադրբեջանն այս տարվա մայիսից նրանց արգելել է տաճարի տարածք մտնել եւ կրկին` առանց որեւէ պատճառաբանության:
