Ղարաբաղի հարցով մշտական խորհրդարանական հաձնաժողովը պետք է զբաղվի հարցերի համակարգմամբ՝ աջակցություն ցուցաբերելով քաղաքական, սոցիալական, ռազմական, դիվանագիտական եւ այլ ոլորտներում։ Այս մասին ՀՀ 8-րդ գումարման նորընտիր Ազգային ժողովի հատուկ նիստում օգոստոսի 6-ին մշտական խորհրդարանական հանձնաժողովների կազմավորման հարցի քննարկման ընթացքում ասաց «Պատիվ ունեմ» ընդդիմադիր խմբակցության քարտուղար Հայկ Մամիջանյանը։
Բացի այդ, նշեց պատգամավորը, այն աջակցություն կցուցաբերի բանակցային գործընթացում, ինչպես նաեւ կարեւոր մի շարք այլ ուղղություններում։
«Ղարաբաղի խնդիրը պետք է քննարկվի ամենօրյա ռեժիմով»,- ասաց խորհրդարանականը։
Նա կարծում է, որ այդ հանձնաժողովը պետք է զբաղվի նաեւ սահմանագծման պրակտիկայի ուսումնասիրման հարցերով եւ այդ փորձն օգտագործի Հայաստանի եւ Ադրբեջանի, ինչպես նաեւ Լեռնային Ղարաբաղի եւ Ադրբեջանի միջեւ սահմանների որոշման հարցերում։
