Վերաքննիչ քրեական դատարանը՝ նախագահությամբ Տիգրան Սահակյանի, այսօր՝ օգոստոսի 6-ին, մերժեց Սիսիանի համայնքապետ, «Հայաստան» խմբակցության պատգամավոր Արթուր Սարգսյանի նկատմամբ կալանավորումը որպես խափանման միջոց ընտրելու մասին Երեւանի ընդհանուր իրավասության դատարանի որոշման դեմ փաստաբանի բողոքը։ Արթուր Սարգսյանը կշարունակի մնալ կալանավորված։ Այս մասին NEWS.am-ի հետ զրույցում հայտնեց նրա պաշտպան Էմին Խաչատրյանը։
«Ուրիշ ակնալիք չունեինք էլ։ Դատավորն անվրդով դեմքով եկավ և ասաց եզրակացությունը, սակայն որոշումը դեռ չի ներկայացրել։ Մեկ օր ունեին խորհրդակցական սենյակում, և չգիտենք՝ ինչ են արել այդ մեկ օրվա ընթացքում, որ մինչև հիմա որոշումը չեն ներկայացրել»,- նշեց պաշտպանը։
Նա տեղեկացրեց, որ Արթուր Սարգսյանի կալանավորման բողոքի մակագրումը նույնպես ձեռքով է եղել։ Նրանք ապացույց են պահանջել դատարանից, որ մակագրումը տեղի ունեցել այբբենական կարգով, սակայն բանավոր հավաստիացումներից բացի որևէ բան չեն ստացել։ Պաշտպանը ինքնաբացարկի միջնորդություն էր ներկայացրել դատավորին, սակայն դա մերժվել էր։
Էմին Խաչատրյանը հայտնեց, որ որոշումը պատրաստվում են բողոքարկել Վճռաբեկ դատարանում։
«Ուղղակի այստեղ ժամանակային խնդիր կա։ Երեք օրվա ընթացքում մեզ նոր պետք է որոշում ուղարկեն, մենք ծանոթանանք, որպեսզի բողոքարկենք, և Վճռաբեկ դատարանն էլ որոշում կարող է ընդունել երկու ամսվա ընթացքում։ Ամեն դեպքում Վճռաբեկ դատարանից էլ մեծ ակնկալիքներ չունենք, բայց պետք է բոլոր ատյանները Հայաստանում սպառենք, որպեսզի դիմենք Մարդու իրավունքների եվրոպական դատարանին»,- հավելեց պաշտպանը։
Նշենք, որ Արթուր Սարգսյանը մեղադրվում է ՀՀ Քրեական օրենսգրքի 308-րդ հոդվածի երկրորդ մասի (պաշտոնեական լիազորությունները չարաշահելը) և 314-րդ հոդվածի առաջին մաս (պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելը, կեղծում, քերվածք կամ այլ թվական գրառումներ կամ փոփոխություններ կատարելը, ինչպես նաև կեղծ փաստաթղթեր կազմելը կամ հանձնելը) հատկանիշներով:
