Այս պահի դրությամբ Սեւանա լճի մակարդակը անցյալ տարվա նույն օրվա համեմատ 4 սմ ցածր է: Այս մասին, այսօր՝ օգոստոսի 6-ին, կառավարության նիստում հայտարարեց Շրջակա միջավայրի նախարար Ռոմանոս Պետրոսյանը:
«Սեւանա լճից իրականացված ջրառը 170 մլն խմ թույլատրելի պաշարից արդեն սպառվել է 157 մլն խմ-ն: Օրական 2-2,5 մլն խմ ջուր է բաց թողնվում, այսինքն մենք մինչեւ օգոստոսի առաջին կեսի ավարտ դեռեւս ունենք բաց թողնման որոշակի ծավալ»,-ասաց նա:
Վարչապետ Նիկոլ Փաշինյանը հեգնանքով նկատեց, որ այս իրավիճակի ճիշտ գնահատականը տվել է Չերչիլը՝ ասելով, որ լավ քաղաքական գործիչը նա է, որ կանխատեսում է, թե ինչ է տեղի ունենալու եւ 4 ամիս հետո բացատրում է, թե ինչու դա տեղի չունեցավ. «Հիմա մենք շատ լավ բացատրում ենք, թե ինչու դա տեղի չունեցավ: Ընդ որում այս պրոբլեմը բոլոր ոլորտներում է: Մենք կանխատեսելու շատ լուրջ պրոբլեմ ունենք՝ սկսած բյուջեի եկամուտներից: Երբ ասում ենք կառավարման որակ, դա այն է, որ յուրաքանչյուրն իր տված կանխատեսման իրականություն դառնալու համար կրի պատասխանատվություն»,-ասաց նա:
Նշենք, որ այսօր կառավարությունը որոշում կայացրեց Սեւանա լճից լրացուցիչ մինչեւ 75 մլն խմ ջրառ իրականացնել: Տարեկան թույլատրելի նորմակն 170 մլն խմ է, այն դարձավ 245 մլն խմ: