Հարկային օրենսգրքում էլեկտրոնային ծառայություններ մատուցող ընկերությունների հարկային փոփոխությունը կհամապասխանեցնի հարկային ռեժիմները տեղական և օտարերկրյա ծառայություններ մատուցող ընկերությունների հետ։ Այս մասին այսօր՝ օգոստոսի 6-ին, Կառավարության նիստից հետո՝ լրագրողների հետ հանդիպմանը, նշեց Էկոնոմիկայի նախարար Վահան Քերոբյանը։

«Հայաստանի Հանրապետությունում էլեկտրոնային ծառայություններ մատուցող ընկերությունները, օրինակ՝ Linkedin, Facebook, Google, Yandex taxi և բազմաթիվ այլ ընկերություններ ծառայություններ են մատուցում Հայաստանում և դրա համար չեն վճարում։ Այս փոփոխությունը շատ ֆունդամենտալ է, որը մեզ կօգնի որ մենք ոչ միայն էկան հարկային մուտքեր ունենանք այլ նաև համապասխանեցնենք հարկային ռեժիմները տեղական և օտարերկրյա ծառայություններ մատուցող ընկերությունների հետ։ Օրինակ լրատվական ծառայություններն էլ վճարում են ավելացրած արժեքի հարկ, բայց այդ ընկերությունները չեն վճարում, այնպես ինչպես դուք։ Այնպես որ՝ հավասարեցվում են մրցակցային դիրքերը»,- ասաց նա։

Քերոբյանի կարծիքով՝ այս փոփոխությունը մեկ քայլ առաջ կտանի համակարգը, և դաշտ կմտնեն այն անձինք և ընկերությունները, որոնք աշխատում են այդ էլեկտրոնային հարթակների հետ։

«Եթե ինչ-որ տաքսիստ ծառայություն է մատուցում Yandex taxi-ին, այդ մարդիկ ևս կմտնեն հարկային դաշտ։ Մենք պատրաստվում ենք բոլորին մտցնել վերահսկողության տակ, կարծում եմ, որ մինչև տարվա վերջ, որովհետև այս տարի արդեն մի քանի քննարկում ենք ունեցել տաքսիի և ուղևորափոխադրումների ոլորտների հարկման վերաբերյալ։ Ընդամենը մեկ-երկու հանդիպում, և համապաստախան նախագծերը կմտնեն շրջանառության մեջ։ Մեր խնդիրներից է այնպես անել, որ բոլոր մարդիկ, որոնք եկամուտ են ստանում, մասնակցեն պետության ծախսերին։ Մենք հիմա այն վիճակում չենք, որ մեզ շռայլություն թույլ տանք այս կամ այն հարկը չհավաքել»,- հավելեց Վահան Քերոբյանը։