Ամերիկյան Apple ընկերությունը պաշտոնապես հաստատել է, որ լուսանկարների բովանդակության ստուգում է ներդնում iOS եւ iPadOS սարքերում: Միջոցառումը նպատակ ունի սահմանափակել երեխաների նկատմամբ սեռական բռնության վերաբերյալ նյութերի տարածումը, փոխանցում է «ՌԻԱ Նովոստին»:
Համակարգային մակարդակում նոր գաղտնագրման ծրագրեր են կիրառվել: Տեխնոլոգիան կբացահայտի iCloud Photos-ում պահվող արգելված նյութերը, որոնք երեխաների նկատմամբ բռնության տեսարաններ են պարունակում: Նման բովանդակության հայտնաբերման դեպքում Apple-ը տեղեկատվություն կտրամադրի դրա մասին իրավապահ մարմիններին:
Կասկածելի լուսանկարներից բացի, iOS-ը կհետեւի համանուն հավելվածում ստացված հաղորդագրությունների բովանդակությանը: Մեքենայական ուսուցման միջոցով համակարգը կնախազգուշացնի երեխաներին եւ նրանց ծնողներին սեռական բնույթի լուսանկարների եւ հղումների ստացման եւ ուղարկման մասին:
Ի վերջո, կմիջամտեն ձայնային օգնական Siri-ն եւ Search-ը, եթե օգտվողը որոնի թեմաներ, որոնք վերաբերում են երեխաների սեռական բռնության նյութերին: Համակարգն օգտագործողին կբացատրի, որ հետաքրքրությունն այդ թեմայի նկատմամբ վնասակար եւ վտանգավոր:
Նման ֆունկցիոնալը կաշխատի iPhone-ի եւ iPad-ի վրա iOS 15-ի թողարկումից հետո, այսինքն՝ 2021 թվականի աշնանը: Առայժմ կանխարգելիչ գրաքննությունը կգործի միայն ԱՄՆ-ում, սակայն ընկերությունը մտադիր է այդ պրակտիկան տարածել այլ տարածաշրջանների վրա:
