Ford Motor-ի, General Motors-ի եւ Stellantis-ի (նախկին Fiat Chrysler Automobiles) ղեկավարները աջակցել են ԱՄՆ նախագահ Ջոզեֆ Բայդենի որոշմանը՝ մինչեւ 2030 թվականը զրոյական արտանետումներով ավտոմեքենաների վաճառքը հասցնել 50%-ի, հայտնում է CNBC-ը:
«Ford-ը, GM-ը եւ Stellantis-ն այսօր հայտարարում են մինչեւ 2030 թվականը ԱՄՆ-ի էլեկտրամոբիլների տարեկան վաճառքը 40-50%-ի հասցնելու իրենց համատեղ ձգտման մասին, որպեսզի երկիրը մոտեցնեն զրոյական արտանետումներով ապագային՝ Փարիզի կլիմայական համաձայնագրին համապատասխան»,- հայտնել են ավտոկոնցեռնների ներկայացուցիչները։
Բացի այդ, ապրանքանիշների ներկայացուցիչներն ընդգծել են, որ պատրաստ են անել ամեն ինչ, ինչ իրենցից պահանջվում է՝ այս նպատակին հասնելու համար, սակայն մասնավոր հատվածը չի կարող գլուխ հանել առանց պետության աջակցության:
General Motors-ը խոստացել է 35 միլիարդ դոլար ներդնել էլեկտրական եւ ինքնակառավարվող մեքենաների արտադրության մեջ: Ford-ը նույնպես խոստացել է 30 մլրդ դոլար ներդնել: Իր հերթին, Stellantis-ը հինգ տարվա ընթացքում 35 մլրդ դոլար կներդնի նոր ռազմավարության մեջ, ինչպես նաեւ կկառուցի մարտկոցների հինգ նոր գործարան:
