Ջրի սակավության հետ կապված Ստեփանակերտում ստեղծված իրավիճակը, «Ջրմուղ կոյուղի» ՓԲԸ–ի հետ համատեղ Արցախի ՆԳ նախարարության ԱԻ պետական ծառայությունում ստեղծվել է աշխատանքային խումբ, որը կզբաղվի ջրամատակարարման աշխատանքներով: Այս մասին NEWS.am–ը տեղեկանում է Արցախի ԱԻՊԾ–ից։
«Բնակչությանը ժամանակավոր ջուր մատակարարելու համար ԱԻ ծառայությունը գործի կդնի ունեցած ամբողջ հնարավորությունները, տեխնիակական ու մարդկային ռեսուրսները:
Այն բնակիչները, որոնք ապրում են բարձրահարկ շենքերում, ունեն սահմանափակ կարողություններ (տարեց, հաշմանդամ), կարող են զանգահարել 911, 047 94-09-11, 23-01, 047 94-58-71 թեժ գծի հեռախոսահամարներին:
Արտակարգ իրավիճակների պետական ծառայությունը եւ շահագրգիռ բոլոր կառույցներն այս պահին ձեռնարկում են բոլոր միջոցները ջրի հետ կապված խնդիրը ժամ առաջ լուծելու նպատակով»,– ասվում է հաղորդագրության մեջ։
Նշենք, որ վերջին օրերին Արցախի մայրաքաղաքում ջրի սակավություն կա։ Այսօր Ստեփանակերտի քաղաքապետարանը հայտարարություն է տարածել, որ կդադարեցվի Ստեփանակերտում գործող բոլոր ավտոլվացման կետերի եւ հանգստի գոտիների ջրօգտագործումը՝ մինչեւ քաղաքը սնուցող զտիչ կայաններում ջրի պաշարների վերականգնումը։