ՄԱԿ Անվտանգության խորհուրդը կոչ է անում անհապաղ դադարեցնել ռազմական գործողությունները Աֆղանստանում եւ ստեղծել «միասնական, ներառական եւ ներկայացուցչական» նոր կառավարություն, որում նաեւ կանայք կլինեն:
ՄԱԿ Անվտանգության խորհուրդը հայտարարել է, որ «անհրաժեշտ է ապահովել Աֆղանստանի ինստիտուցիոնալ իրավահաջորդությունն ու միջազգային պարտավորությունների պահպանումը, ինչպես նաեւ՝ Աֆղանստանի եւ օտարերկրյա բոլոր քաղաքացիների անվտանգությունը»:
Խորհրդի անդամները «կոչ են արել անհապաղ դադարեցնել բռնությունները Աֆղանստանում» եւ «վերականգնել անվտանգությունը, քաղաքացիական եւ սահմանադրական կարգը», ինչպես նաեւ՝ իշխանության ներկա ճգնաժամը լուծելու եւ լուծում գտնելու համար հրատապ բանակցություններ սկսել:
Խորհուրդը, առանց թալիբներին առանձնացնելու, նաեւ կոչ է արել բոլոր կողմերին հավատարիմ մնալ մարդու իրավունքների միջազգային չափանիշներին եւ «վերջ դնել բոլոր չարաշահումներին ու խախտումներին»: Նա նաեւ կոչ է արել ՄԱԿ-ի եւ հումանիտար այլ անձնակազմերի հասանելիություն ապահովել՝ միլիոնավոր կարիքավորներին օգնելու համար:
Աֆղանստանի հարցով արտակարգ նիստի ժամանակ հայտարարությունը հավանության է արժանացել խորհրդի բոլոր 15 անդամների կողմից: