Օգոստոսի 17-ին Արցախի խորհրդարանի ղեկավարը ընդունել է «Արդարություն» խմբակցության անդամներին: Այս մասին NEWS.am-ին տեղեկացնում են ԱՀ ԱԺ լրատվության եւ հանրության հետ կապերի բաժնից։
ԱԺ նախագահը ողջունելով խմբակցության անդամներին՝ ներկայացրել է իր՝ որպես խորհրդարանի ղեկավարի պաշտոնական եւ ոչ պաշտոնական, ինչպես նաեւ չլուսաբանված հանդիպումների մասին տեղեկատվություն եւ դրանցից ակնկալված ու ստացված արդյունքները:
Արթուր Թովմասյանը կարեւորել է Արցախի «Արդարություն» կուսակցության գործունեությունը՝ որպես երկրում գործող ընդդիմադիր ուժի եւ ընդգծել. «Եթե իշխանությունը իր թիկունքում չզգա ընդդիմության շունչը, ապա այն լճացում կապրի բառիս ամբողջական իմաստով»։
Խմբակցության ղեկավար Դավիթ Գալստյանը գոհունակություն է հայտնել ընդունելության համար, կիսվել խմբակցության մտահոգություններով եւ հույս հայտնել,որ նման ձեւաչափով հանդիպումները կլինեն շարունակական:
Հանդիպմանը քննարկվել են ՀՀ ԱԺ-ում Արցախի հարցերով հանձնաժողովի ստեղծման անհրաժեշտության եւ կարեւորության մասին, ԱՀ եւ ՀՀ միջխորհրդարանական կապերի վերականգնմանն ու ակտիվացմանն առնչվող եւ այլ հարցեր:
ԱԺ նախագահը վստահեցրել է, որ խմբակցության կողմից ներկայացված ցանկացած առաջարկ պատրաստ են քննարկելու:
