Եվրամիության արտաքին քաղաքական գերատեսչության ղեկավար Ժոզեպ Բորելը ակնկալում է, որ Թուրքիան «շատ կարեւոր» դեր կունենա Աֆղանստանից փախստականների հոսքը կարգավորելու գործում, հաղորդում է Duvar English-ը:
Իսպանիայի հանրային հեռուստատեսությանը տված հարցազրույցում Բորելն ասել է, որ ԵՄ-ն պետք է սերտորեն համագործակցի Աֆղանստանի եւ Եվրոպայի միջեւ ճանապարհին գտնվող երկրների հետ` «մարդասիրական ճգնաժամից խուսափելու համար»: Նա հավելել է, որ Թուրքիան հատկապես կարեւոր դեր կխաղա դեպի Եվրոպա աֆղանցիների հոսքը զսպելու ջանքերում:
«Շատ աֆղանցիներ կփորձեն Թուրքիայով հասնել Եվրոպա: Այս դեպքում Թուրքիան շատ կարեւոր դեր կխաղա»,- ասել է Բորելը իսպանական RTVE հանրային հեռուստաընկերության եթերում:
Այն բանից հետո, երբ սեպտեմբերին Միացյալ Նահանգները հայտարարեց Աֆղանստանից իր զորքերը դուրս բերելու մտադրության մասին, Թուրքիան Աֆղանստանից միգրանտների հոսք է ընդունում: Այժմ, երբ Աֆղանստանը անցել է թալիբների վերահսկողության տակ, Թուրքիան եւ ԵՄ անդամները մտավախություն են հայտնում, որ Աֆղանստանում տիրող քաոսը կհանգեցնի նրան, որ աֆղանցիները կփախչեն՝ փորձելով փրկվել թալիբների դաժան իշխանությունից:
Նախագահ Ռեջեփ Էրդողանը խոստովանել է, որ կիրակի օրը, երբ թալիբները մտել են Քաբուլ, Թուրքիա աֆղանցի փախստականների հոսք է ուղեւորվել: