ՄԱԿ-ի Պարենի համաշխարհային ծրագիրը (ՊՀԾ) հաջորդ շաբաթ վերսկսելու է Աֆղանստանում մարդասիրական գործողությունները: Այս շաբաթ պարենային օգնություն է տրամադրվել 80.000 մարդու: Ավելի վաղ ՄԱԿ-ը հայտարարել էր, որ դադարեցնում է հումանիտար օգնության միջանցքներով նախատեսված մատակարարումները՝ կապված Աֆղանստանում տիրող իրավիճակի հետ, փոխանցել է ՏԱՍՍ-ը:
«Մենք ստիպված եղանք ժամանակավորապես դադարեցնել մեր գործունեությունը որոշ շրջաններում, որտեղ տեղի էին ունենում զինված բախումներ եւ բռնության գործողություններ: Սակայն ակնկալում ենք, որ բոլոր մարդասիրական գործողությունները կվերսկսվեն հաջորդ շաբաթ, եթե իրավիճակը թույլ տա: Մեր անձնակազմի անվտանգության ապահովման դեպքում ՊՀԾ-ն շարունակելու է աջակցություն տրամադրել Աֆղանստանի ժողովրդին», - գործակալության թղթակցին ասել է ՊՀԾ ներկայացուցիչ Ֆրենսիս Քենեդին:
«Միայն այս շաբաթվա ընթացքում օգնություն ենք ցուցաբերել 80 հազար մարդու եւ մինչ այժմ կարողացել ենք սնունդ տրամադրել 400 հազար մարդու, ովքեր ստիպված են եղել լքել իրենց տները», - հավելել է նա:
Զրուցակիցը հայտնել է, որ Աֆղանստանում տիրող անկայուն իրավիճակը կարող է հանգեցնել ծրագրի գործունեության հետագա ժամանակավոր ընդհատումների: Նա ընդգծել է, որ կազմակերպությունն անում է հնարավոր ամեն բան, որպեսզի շարունակի գործունեությունը, սակայն ՊՀԾ-ն լրացուցիչ ֆինանսավորման կարիք ունի: Նա պարզաբանել է, որ գործողությունը մինչեւ տարեվերջ շարունակելու համար 200 միլիոն դոլար է հարկավոր:
