«Մեծ յոթնյակի»-ի երկրների ղեկավարները հայտարարել են, որ «Թալիբանը» պատասխանատու է ահաբեկչությունը կանխելու, մարդու իրավունքները հարգելու եւ Աֆղանստանում խաղաղ լուծում գտնելու համար:
G7-ի հայտարարությունը արվել է Մեծ Բրիտանիայի կողմից հրավիրված արտակարգ նիստից հետո եւ Աֆղանստանի վերաբերյալ գլոբալ ռազմավարության դաշնակիցներին միավորելու ջանքերի մաս է հանդիսանում:
«Մասնավորապես, մենք վերահաստատում ենք, որ «Թալիբանը» պատասխանատվության է կրելու ահաբեկչությունը կանխելու իրենց գործողությունների համար՝ մարդու իրավունքների, մասնավորապես՝ կանանց, աղջիկների եւ փոքրամասնությունների իրավունքների, ինչպես նաեւ Աֆղանստանում համապարփակ քաղաքական կարգավորման հասնելու համար», - ասվում է հայտարարության մեջ:
«Մենք կոչ ենք անում Աֆղանստանի բոլոր կողմերին բարեխղճորեն աշխատել ներառական եւ ներկայացուցչական կառավարություն ստեղծելու համար՝ կանանց եւ փոքրամասնությունների ներկայացուցիչների իրական մասնակցությամբ:
Ցանկացած ապագա կառավարության օրինականությունը կախված է նրանից, թե «Թալիբանը» ինչ մոտեցում է ցուցաբերում իր միջազգային պարտավորությունները եւ Աֆղանստանում կայունության ապահովման պարտավորությունը կատարելու համար»:
G7-ի երկրները, ԵՄ-ն եւ ՆԱՏՕ-ն ընդգծել են իրենց նվիրվածությունը Աֆղանստանի ժողովրդին, հումանիտար օգնության տրամադրման եւ փախստականներին աջակցություն ցուցաբերելու պատրաստակամությունը: Հայտարարության մեջ ասվում է, որ «առաջնահերթ խնդիրը իրենց քաղաքացիների եւ այն աֆղանստանցիների անվտանգ տարհանումն է, ովքեր համագործակցել են իրենց հետ եւ աջակցել վերջին քսան տարիների ընթացքում, ինչպես նաեւ Աֆղանստանից նրանց անվտանգ ելքի ապահովումը»:
