ՄԱԿ-ի գլխավոր քարտուղար Անտոնիո Գուտերեշը մտահոգություն է հայտնել Քաբուլում տեղի ունեցած պայթյունների ֆոնին տիրող իրավիճակի վերաբերյալ եւ ընդգծել է երկրի ժողովրդին աջակցելու միջազգային կազմակերպության պատրաստակամությունը, հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը: Այս մասին հայտնել է ՏԱՍՍ-ը:
«ՄԱԿ-ի գլխավոր քարտուղարը մեծ անհանգստությամբ է հետեւում իրավիճակին: Նա դատապարտում է այս ահաբեկչական հարձակումները, որոնց արդյունքում խաղաղ բնակիչներ են զոհվել, եւ ցավակցում է զոհերի ընտանիքներին», - հայտնել է խոսնակը:
«Տեղի ունեցածը վկայում է Աֆղանստանում անկայուն իրավիճակի մասին, որն ամրապնդում է Աֆղանստանի ժողովրդին օգնություն ցուցաբերելու մեր վճռականությունը», - ավելացրել է Դյուժարիկը: