Կառավարությունում պատասխանատու պաշտոնյաները, Իրանից եկող բեռնատարների՝ Երեւան հասնելու համար, ընդգրկված են հարցի կարգավորման մեջ։ Այս մասին այսօր՝ օգոստոսի 27–ին, Կառավարությունում լրագրողների հետ զրույցում ասաց Էկոնոմիկայի նախարար Վահան Քերոբյանը։
«Անտրաբանական է, որ բոլորս նետվենք ինչ–որ հարցի լուծման համար, դրա համար կան պրոֆեսիոնալ պատասխանատուներ։ Թիմը զբաղվում է, կարծում եմ՝ շուտով այդ հարցը լուծում կստանա։ Իհարկե Հայաստանի Հանրապետության սահմանը սկսում է Մեղրիից եւ իրանական մեքենաները Հայաստան մտնելու հետ կապված խնդիրներ չունեն, ունեն խնդիր Երեւան հասնելու հետ։ Այդ խնդիրն այս պահին լուծվում է շրջանցող ճանապարհի միջոցով, սակայն դա հարմարեցված չէ խոշոր բեռնատարների համար»,– նշեց Վահան Քերոբյանը։
Նշենք, որ գրեթե երկու օր է՝ ադրբեջանական ԶՈՒ–երը փակել են Գորիս–Կապան միջպետական ճանապարհի Շուռնուխ–Կարմրաքար, ինչպես նաեւ Գորիսից Որոտան տանող ճանապարհահատվածները։ Խոսքը Մ2 ճանապարհի մասին է, որ Հայաստանին կապում է Իրանի հետ։
Էկոնոմիկայի նախարարն ասաց, թե Կառավարությունն ամեն ինչ անում է, որ ժամ առաջ այդ ճանապարհները բացվեն. «Ինչքանով որ ես տեղյակ եմ հենց հիմա եռակողմ ձեւաչափով ինտենսիվ բանակցություններ են գնում, որ այդ ճանապարհը շուտափույթ բացվի»։
Էկոնոմիկայի նախարարը չասաց՝ ադրբեջանիցների կողմից փակված ճանապարհահատվածները Հայաստանի սուվերեն տարածք համարո՞ւմ է, թե՝ ոչ։ «Ես էդ տիպի հարցերի գիտակ չեմ, դա պետք է նայել, թե ինչ տիպի պայմանավորվածություններ են եղել։ Դուք էլ շատ լավ գիտեք, որ այդ ճանապարհի որոշ հատվածներ եղել են Խորհրդային Ադրբեջանի տարածքում, ինչու եք նման հարցեր տալիս»։
Վահան Քերոբյանը հայտնեց, որ այսօր նախարարությունում քննարկվել են շրջափակման մեջ ընկած գյուղերի բնակիչներին պարենով ապահովելու վերաբերյալ հարցերը։ Նախօրեին հայտնի էր դարձել, որ ռուս սահմանապահներն էին Որոտանի բնակիչներին սնունդ հասցրել։
Հիշեցնենք՝ օգոստոսի 25–ին, ժամը 23։00-ից ադրբեջանական ԶՈՒ–երը փակել են Գորիս–Կապան միջպետական ավտոճանապարհի Շուռնուխ–Կարմրաքար հատվածը՝ Շուռնուխ գյուղից մոտ 10 կմ հեռավորության վրա եւ հրաժարվում են բացել։ Նախորդ գիշեր տարհանվել էին ճանապարհին գտնվող շուրջ 4 տասնյակ ավտոմեքենաները։
Նախօրեին Մարդու իրավունքների պաշտպանի գրասենյակը ահազանգել էր նաեւ, որ ադրբեջանական զինված ծառայողները կեսօրին փակել են նաեւ Գորիսից Որոտան տանող ճանապարհը։ Ադրբեջանական կողմը շարունակում է փակ պահել այդ ճանապարհահատվածները։