Չեխիայում երկուշաբթի մեկնարկել են ՆԱՏՕ-ի Ample Strike-2021 զորավարժությունները: Դրանցում ներգրավված են դաշինքի ինը երկրներից 700 զինծառայողներ: Այս մասին հայտնել է Չեխիայի ռադիոն՝ հղում անելով հանրապետության պաշտպանության նախարարությանը:
Զորավարժությունները, որոնց մասնակցում է մոտ 500 չեխ զինվորական եւ 200 զինվոր ՆԱՏՕ-ի ութ այլ երկրներից, տեւելու են մինչեւ սեպտեմբերի 19-ը: Խնդիր է դրված մշակել պայմանական թշնամու թիրախների դեմ մարտական ավիացիայի անձնակազմի եւ ուղղորդման ցամաքային ծառայությունների փոխազդեցությունը:
Զորավարժություններում ներգրավված են Չեխիայի, Սլովակիայի, Ֆրանսիայի, Գերմանիայի, Հունգարիայի, ԱՄՆ-ի, Նիդեռլանդների, Լեհաստանի եւ Մեծ Բրիտանիայի զինված ուժերի զինծառայողները: Ավիացիոն տեխնիկայից ներկայացված են Jas-39 Gripen գերձայնային կործանիչներ, L-159 Alca թեթեւ բազմաֆունկցիոնալ հարձակողական ինքնաթիռներ, Mi-24 ուղղաթիռներ, Learjet եւ L-39C ինքնաթիռներ: ԱՄՆ-ը լիցքավորող ինքնաթիռներ եւ F-15 կործանիչներ է ուղարկելու: