Աֆղանստանում «Իսլամական պետության» զինյալները ստանձնել են երկուշաբթի Քաբուլում հրթիռակոծության պատասխանատվությունը՝ հայտարարելով, որ իրենք առնվազն 6 «Կատյուշա» տեսակի հրթիռ են արձակել Աֆղանստանի մայրաքաղաքի օդանավակայանի ուղղությամբ: Հրթիռները Քաբուլի օդանավակայանի հարակից տարածքում են գտնվում, հայտնել է AP-ն:
Ամերիկացի զինվորականները հայտնել են, որ երկուշաբթի առավոտյան հինգ հրթիռ է արձակվել օդանավակայանի ուղղությամբ, եւ ամերիկյան զորքերը դրանք որսալու համար պաշտպանական համակարգ են օգտագործել:
Հարձակումը չի դադարեցրել ամերիկյան C-17 ռազմական բեռնատար ինքնաթիռների անդադար հոսքը, որոնք թռչում եւ վայրէջք էին կատարում Համիդ Քարզայի միջազգային օդանավակայանում:
Սա զինյալների վերջին հարձակումն էր: Անցյալ հինգշաբթի «Իսլամական պետություն» խմբավորումը ահաբեկչական գործողություն էր իրականացրել օդանավակայանի դարպասների մոտ, որի հետեւանքով զոհվել էր առնվազն 169 աֆղանստանցի եւ 13 ամերիկացի զինծառայող:
