Հայաստանը բազմիցս հայտարարել է, որ մենք պատրաստ ենք, որ մենք կարգավորումը տեսնում ենք միայն խաղաղ բանակցությունների միջոցով, ուստի պատրաստ ենք հանդիպման: Այս մասին Մոսկվայում ՌԴ ԱԳ նախարար Սերգեյ Լավրովի հետ համատեղ ասուլիսին ասաց Հայաստանի արտգործնախարար Արարատ Միրզոյանը:
Բաքվին գերիներին վերադարձնելուց հրաժարվելու մասին հարցին Միրզոյանը նշեց. «Հայաստանը վաղուց կատարել է իր պարտավորություններն այս հարցում: «Բոլորը բոլորի դիմաց» սկզբունքի համաձայն՝ հայկական կողմը ազատ արձակեց եւ վերադարձրեց ադրբեջանցի բոլոր ռազմագերիներին: Մենք կարծում ենք, որ Ադրբեջանը պետք է վերադարձնի նաեւ բոլոր հայ ռազմագերիներին եւ պահվող այլ անձանց: Ոչ միայն հանուն նոյեմբերի 9-ի հայտարարության դրույթներով ստանձնած մեր պարտավորությունների կատարման այլեւ փոխվստահության մթնոլորտ ստեղծելու համար, եւ այդ մթնոլորտում արդեն հնարավոր է անցնել հետագա գործընթացներին, քննարկել վերջնական կարգավորման բոլոր հարցերը»:
