ՆԱՏՕ-ն ձգտելու է տարհանել առավել խոցելի աֆղանցիներին եւ կապ պահպանել թալիբների հետ: Այդ մասին հայտարարել է դաշինքի գլխավոր քարտուղար Յենս Ստոլտենբերգը՝ հավելելով, որ Աֆղանստանի նոր կառավարիչները ստիպված կլինեն իրենց օգնությանն ու ճանաչմանն արժանի դրսեւորել:
Նրա խոսքով՝ բազմաթիվ աֆղանցիներ, ովքեր համագործակցել են միջազգային ուժերի հետ, եւ, հետեւաբար, կարող են վտանգի ենթարկվել թալիբների կողմից, մնացել են Աֆղանստանում: «Մարդկանց այնտեղից դուրս բերելու համար հարկավոր է արագ կապ հաստատել թալիբների հետ»,- ասել է նա Reuters-ին: «ՆԱՏՕ-ին հաջողվել է տարհանել մեզ համար աշխատող անձնակազմի մեծ մասին: Բայց մարդիկ դեռ մնացել են, եւ մենք կշարունակենք աշխատել նրանց դուրսբերման ուղղությամբ»:
Նա նախազգուշացրել է, որ թալիբների կառավարությունն արագ չի ճանաչվի: Ստոլտենբերգը հայտարարել է, որ դեռ վաղ է դատել «Թալիբան» շարժման համահիմնադիր Մուլլա Բարադարի նշանակմանը նոր կառավարության ղեկավարի պաշտոնում: «Մենք պետք է դատենք նրանց գործողություններից, այլ ոչ թե խոսքերից»,- ասել է նա: «Մենք կօգտագործենք մեր լծակները, քաղաքական, դիվանագիտական եւ ֆինանսական լծակներն Աֆղանստանի նոր կառավարիչների վրա»,- ասել է նա: Նրա խոսքով` դիվանագիտական ճանաչումը կքննարկվի ՆԱՏՕ-ի դաշնակիցների եւ ավելի լայն միջազգային հանրության միջեւ` «Թալիբանի կառավարության վրա հնարավորինս մեծ ճնշում գործադրելու համար»: