Գերմանիայի կառավարությունն առաջարկել է պարտադրել սմարթֆոն արտադրողներին պահպանել իրենց սարքերի ծրագրային թարմացումը երկարատեւ ժամանակի համար, տեղեկացնում է Appleinsider պարբերականը։
Գերմանիայի դաշնային կառավարությունը բանակցություններ է սկսել Եվրահանձնաժողովի հետ այն առաջարկությունները փոփոխելու վերաբերյալ, որոնք վերաբերում են սմարթֆոնների եւ պլանշետների նորոգմանն ու սպասարկմանը։ Լրագրողները ճշտել են, որ Եվրահանձնաժողովն առաջարկում է սահմանել սմարթֆոնների եւ այլ գաջեթների ծրագրային ապահովման պահպանման հինգ տարվա ժամկետ, այն դեպքում, երբ Գերմանիայի ներկայացուցիչները պնդում են, որ այդ ժամկետը լինի յոթ տարի։
Բացի սպասարկման ժամկետի ավելացումից, Գերմանիայի կառավարությունում առաջարկում են, որպեսզի ընկերությունները ներկայացնեն պահեստամասեր գաջեթների համար «խելամիտ գնով»։ Պաշտոնյաները կարծում են, որ այդ կերպ կարելի է ավելացնել սարքի ծառայության ժամկետը եւ նվազեցնել բացասական ազդեցությունը շրջակա միջավայրի վրա։
Մինչ պաշտոնյաները մտադիր են ավելացնել ԾԱ պահպանման ժամկետը, DigitalEurope ասոցիացիայի անդամները առաջ են մղում երեք տարվա ընթացքում անվտանգության թարմացման, երկու տարվա ընթացքում՝ ֆունկցիոնալ թարմացման գաղափարը։ Լրագրողները ճշտել են, որ կազմակերպության մեջ մտնում են այնպիսի ընկերություններ, ինչպիսին են Apple-ը, Google-ը եւ Samsung-ը։ Ակնկալվում է, որ Եվրահանձնաժողովն իր առաջարկությունն այս հաշվով կներկայացնի մինչեւ 2023 թվականը։
