Թաիլանդը ծրագրում է հոկտեմբերին օտարերկրյա զբոսաշրջիկների համար բացել Բանգկոկը եւ այլ առանցքային ուղղությունները՝ նպատակ ունենալով վերակենդանացնել զբոսաշրջության տուժած ոլորտն այն բանից հետո, երբ նշաններ են ի հայտ եկել, որ նոր կորոնավիրուսով վարակվածների թիվը, հնարավոր է, հասել է գագաթնակետին, հայտնել է Reuters-ը:
Բանգկոկը, Հուա Հին, Պատայան եւ Չիանգ Մայը ներառվել են այն վայրերի ցանկում, ուր կարող են այցելել ամբողջությամբ պատվաստված ճանապարհորդները, որոնք որոշակի չափանիշներով մի շարք թեստավորումներ կանցնեն, ասել է կառավարության պաշտոնական ներկայացուցիչ Տանակորն Վանգբունկոնգչանը:
Բանգկոկի բացումը կլինի մասնակի եւ կսկսվի այցելուներին հայտնի շրջաններում:
Այնուամենայնիվ, պատվաստումները կարող են խոչընդոտ հանդիսանալ հոկտեմբերին ուղղությունների վերաբացման համար, քանի որ Բանգկոկի բնակիչների միայն 34 տոկոսն է ներկայումս ամբողջությամբ պատվաստված, իսկ երկրի բնակչության ընդամենը 15 տոկոսն է ստացել պատվաստանյութի անհրաժեշտ երկու չափաբաժինը: