Դանիան դարձավ առաջին եվրոպական երկիրը, որն ամբողջությամբ վերացրեց հակակովիդային միջոցառումները: Այսօր լրանում է կանոնակարգի ժամկետը, որը COVID-19-ը որպես հատկապես վտանգավոր հիվանդություն է սահմանում, հայտնում է «Լենտա»-ն՝ վկայակոչելով Politico-ն:
Այս դրույթի դադարեցման հետ մեկտեղ դադարել է գործել նաեւ սահմանափակումների աստիճանական վերացման մասին համաձայնագիրը, ըստ որի հոկտեմբերի 1-ից չեղարկվելու են երկրում մնացած բոլոր սահմանափակող միջոցները:
Այժմ ամբողջ երկրում ռեստորան, մարզադահլիճ եւ գիշերային ակումբներ մուտք գործելու համար այլեւս անցաթուղթ չի պահանջվի, երեխաները COVID-19-ով վարակված անձի հետ շփվելիս այլեւս անմիջապես տուն չեն ուղարկվի: Կարանտինը կգործի միայն կորոնավիրուսով հիվանդների համար: Առողջ քաղաքացիները կկարողանան վերադառնալ գրասենյակներ, իսկ երեխաները՝ դպրոցներ:
Իշխանությունների՝ բոլոր սանիտարահիգիենիկ միջոցները չեղյալ հայտարարելու մտադրության մասին հայտնի էր դարձել օգոստոսի վերջին: Համապատասխան տեղեկագիրը տարածել էր Դանիայի առողջապահության նախարարությունը: Թագավորության առողջապահության նախարար Մագնուս Չոյնիկեն երկրում պատվաստումների մակարդակը որպես շատ բարձր է գնահատել: Նա նաեւ խոստովանել է, որ սահմանափակումների վերացումից հետո դրանց դեռ կարող են վերադառնալ, եթե համաճարակաբանական իրավիճակը երկրում հանկարծակի վատանա:
