Պերուի ձախակողմյան «Սենդերո Լումինոսո» ահաբեկչական կազմակերպության հիմնադիր Աբիմայել Գուսմանը մահացել է բանտում՝ 86 տարեկան հասակում, հայտնում է Associated Press-ը:
«Շաբաթ, սեպտեմբերի 11-ին, առավոտյան մոտավորապես 06:40-ին, Կալյաոյի ՌԾՈՒ բազայի տարածքում գտնվող խիստ ռեժիմի բանտում առողջության հետ կապված խնդիրների պատճառով մահացել է կալանավոր Աբիմայել Գուսմանը»,- ասվում է Պերուի կառավարության հայտարարության մեջ:
Գուսմանը ձերբակալվել էր 1992 թվականի սեպտեմբերին եւ դատապարտվել էր ցմահ ազատազրկման:
1980 թվականից ի վեր Պերուում «Սենդերո Լումինոսո»-ի ահաբեկչական գործողությունների հետեւանքով զոհվել է ավելի քան 60 000 մարդ: Երկրին հասցված նյութական վնասը գնահատվում է մոտ 25 միլիարդ դոլար: Գուսմանի ձերբակալությունից հետո խմբավորումը սկսել է կորցնել ազդեցությունը, սակայն վերջին տարիներին ծայրահեղականների փոքր խմբերը շարունակում էին հարձակումներ գործել պերուացի զինվորականների եւ իրավապահ մարմինների ներկայացուցիչների վրա:
