Հայաստանի պետական բյուջեն խնդիր չունի. Կենսաթոշակների վճարման ժամանակավոր կասեցումը պայմանավորված էր այն հանգամանքով, որ որոշում է կայացվել անցնել անկանխիկ վճարումների համակարգին եւ այս մի քանի ամիսը միջանկյալ ժամանակահատված է, որպեսզի կանխիկ եղանակով շարունակեն թոշակները վճարվել, մինչեւ աստիճանաբար այն թոշակառուները, որոնք չունեն, բանկային հաշիվներ բացեն եւ անցնեն անկանխիկ ստացումների: Այս մասին NEWS.am-ի հետ զրույցում նշեց ԱԺ ՔՊ խմբակցության պատգամավոր, տնտեսական հարցերի հանձնաժողովի փոխնախագահ Բաբկեն Թունյանը:
«Քանի որ կանխիկ վճարումը որոշակի ծախս է ենթադրում, բյուջեով որոշակի գումար է նախատեսվում: Սա տեխնիկական խնդիր է եւ այդ ուղղությամբ որեւէ խնդիր չունենք»,-ասաց նա:
Թունյանը հավաստիացրեց, որ պետական բյուջեի վիճակը բավականին նորմալ է. «Տնտեսությունը նախատեսվածից ավելի արագ է աճել, բյուջեի եկամուտները կանխատեսվածից ավելի մեծ են: Այսինքն բյուջետային եկամուտների առումով այս պահին ոչ մի խնդիր չունենք»,-ընդգծեց նա:
Ավելի վաղ NEWS.am-ը հայտնել էր, որ ՀայՓոստը հայտարարել էր, որ սեպտեմբերի 9-ից՝ ժամը 16:00-ից սկսած, ժամանակավորապես չի վճարում կանխիկ եղանակով կենսաթոշակի և մինչև 2 տարեկան երեխայի խնամքի նպաստի վճարումները, քանի որ չի ստացել բավարար չափով դրամական միջոցներ ՀՀ աշխատանքի և սոցիալական հարցերի նախարարության միասնական սոցիալական ծառայության կողմից:
Նույն օրը ավելի ուշ նշվեց, որ սեպտեմբերի 10-ից ժամը 15:00-ից սկսած կանխիկ եղանակով կենսաթոշակի և մինչև 2 տարեկան երեխայի խնամքի նպաստի վճարումները կշարունակվեն իրականացվել:
