Հայաստանի իշխանությունները բոլորից գաղտնի, բանավոր պայմանավորվածությամբ Ադրբեջանին են հանձնել Կովսականը եւ Սանասարը։ Այս մասին ՀՀ ԱԺ նիստում սեպտեմբերի 13-ին ասաց «Հայաստան» խմբակցության պատգամավոր Աննա Գրիգորյանը։

Այս հայտարարությանն ի պատասխան խորհրդարանի նախագահ Ալեն Սիմոնյանը նշեց, որ ԱԺ նախագահը, ըստ էության, ներկայացնում է կառավարող քաղաքական մեծամասնությունը եւ գիտի, որ պաշտոնական տեղեկությունը համապատասխանում է իրականությանը։ «Ոչ ոք ոչ մեկին ոչինչ չի հանձնել։ Երբ օգտագործվում է «հանձնել» տերմինը, նկատի է առնվում, որ այն բոլոր մարդիկ, որոնք պայքարել են ու զոհվել, զոհվել են իզուր եւ հանուն տարածքների հանձնման։ Անգամ դեպքեր են եղել, երբ ինչ-որ քաղաքական գործիչներ առաջնագիծ են գնացել եւ զինվորականներին առաջարկել թողնել այս կամ այն դիրքը՝ հայտարարելով, թե ամեն բան արդեն որոշված է, հանձնված։ Նրանք զինվորականներին առաջարկել են գալ Երեւան եւ պայքարը շարունակել այնտեղ, բայց արդեն Հայաստանում գործող իշխանությունների դեմ»,- մերկապարանոց ասաց խորհրդարանի նախագահը։

Նա նաեւ հայտարարեց, որ գիտի Սյունիքի մարզում ստեղծված իրավիճակի մասին, ճիշտ է միայն այն, ինչի մասին ասվում է պաշտոնական աղբյուրներում։