Ադրբեջանի մաքսային կոմիտեն «իրավական հիմքերը» հարմարեցրել է լկտի գործողություններին Հայաստանում: Հատկանշական է, որ ադրբեջանական հրապարակումներում օգտագործվում են աղավաղված հայկական տեղանունները, ինչը նպատակ ունի մատնանշել դրանց «ադրբեջանական ծագումը»: Հիշեցնենք, որ խոսքը Գորիս-Կապան ճանապարհին ոստիկանական դիրքի եւ իրանական բեռնատարների վարորդների համար հարկների սահմանման մասին է:
Հրապարակումը ներկայացնում ենք առանց փոփոխությունների.
«Ադրբեջանի պետական մաքսային կոմիտեն haqqin.az-ին մեկնաբանել է ԶԼՄ-ների հաղորդագրությունները՝ Ադրբեջանի տարածքով անցնող տրանսպորտային միջոցներից ճանապարհային հարկի եւ այլ մաքսային վճարների գանձման վերաբերյալ: Հարկ է նշել, որ հրապարակումները վերաբերում էին իրանական ավտոմեքենաներին, որոնք անցնում էին Գորուս-Կաֆան մայրուղու՝ Ադրբեջանի կողմից վերահսկվող այն հատվածով, որտեղ ոստիկանական դիրք էր ստեղծվել:
«Ադրբեջանի Հարկային օրենսգրքի 2100-րդ հոդվածի համաձայն՝ օտարերկրյա պետությունների՝ Ադրբեջանի տարածք մտնող եւ դուրս եկող ավտոմեքենաները ենթակա են ճանապարհային տուրքի: Ըստ օրենսգրքի՝ տրանսպորտային միջոցները ենթակա են ճանապարհային հարկի, ինչպես նաեւ պետական տուրքի՝ Ադրբեջանում միջազգային ճանապարհային փոխադրումները կարգավորող թույլտվություն ստանալու համար՝ «Պետական տուրքի մասին» օրենքի 24-րդ հոդվածի համաձայն»,- հայտնել են կոմիտեում:
Պետական մաքսային կոմիտեում ընդգծել են, որ ներկայումս Ադրբեջանի մաքսային մարմիններն ապահովում են այս ուղղությամբ օրենսդրության դրույթների իրականացումը երկրի ամբողջ տարածքում»:
