ՀՀ ԱԳՆ ղեկավար Արարատ Միրզոյանը Սլովակիայի ԱԳՆ ղեկավար Իվան Կորչոկին տեղեկացրել է Ադրբեջանի սադրանքների մասին։
Համատեղ ճեպազրույցի ժամանակ Միրզոյանը հայտնեց, որ իր երախտագիտությունն է հայտնել պանդեմիայի պայմաններում աջակցության, Ադրբեջանի սանձազերծած պատերազմի ժամանակ եւ դրանից հետո դիրքորոշման համար, հատուկ շնորհակալություն է հայտնել Սլովակիայի խորհրդարանի կողմից բանաձեւերի ընդունման համար։
«Մանրամասն քննարկել ենք տարածաշրջանում տիրող իրավիճակը, խոսել Ադրբեջանի կողմից սանձազերծված լայնածավալ ագրեսիայից՝ իրականացված Արցախի ու Արցախի ժողովրդի դեմ, ինչպես նաեւ 44-օրյա պատերազմի օրերին թույլ տրված հանցագործություններից»,-հայտնելց Միրզոյանը։
«Խոսել ենք եռակողմ հայտարարությունից հետո Ադրբեջանի կողմից հայտարարության դրույթների չկատարման մասին, մասնավորապես սա վերաբերում է առաջին հերթին հայ ռազմագերիների եւ բռնի պահվող քաղաքացիական անձանց չվերադարձին։ Խոսել ենք մշակութային ժառանգության պահպանման հարցերի շուրջ, հայ-ադրբեջանական սահմանին տիրող լարվածությունից, եւ Ադրբեջանի կողմից սադրիչ գործողություներից՝ Հայաստանի Հանրապետության տարածք ներխուժելու վերաբերյալ»,-հավելեց Միրզոյանը։
