Facebook-ը կխստացնի օգտվողների համակարգված խմբերի դեմ պայքարը, որոնք խախտում են համայնքի կանոնները կամ դրդում այլ օգտվողներին խախտումներ կատարել ընկերության հարթակներում: Ինչպես հայտնել է Reuters-ը, այդ նպատակով Facebook-ը կօգտագործի մի ռազմավարություն, որն օգտագործվում է կեղծ հաշիվների արգելափակման համար, փոխանցում է ՏԱՍՍ-ը:
Գործակալության տվյալներով՝ նորամուծությունը կարող է լուրջ հետեւանքներ ունենալ Facebook-ի պահանջները խախտող քաղաքական եւ այլ շարժումների համար: Որպես վնասակար գործողությունների օրինակներ՝ բերվել են բովանդակության կամ հաշիվների վերաբերյալ չհիմնավորված զանգվածային բողոքներ՝ դրանց հետագա արգելափակման նպատակով, ինչպես նաեւ ահաբեկման օրինակներ, որի դեպքում օգտվողները միմյանց հետ համակարգված մեկնաբանություններ կամ գրառումներ են թողնում՝ ընդհանուր բացասական նպատակ հետապնդելով:
Ըստ ընկերության մամուլի քարտուղարի, նոր միջոցները անվտանգության թիմերին թույլ կտան բացահայտել համակարգված խմբերին, որոնք պարբերաբար խախտում են սոցցանցի կանոնները եւ ավելի կտրուկ գործողություններ կձեռնարկեն նրանց դեմ, քան առանձին հաղորդագրություններ կամ հաշիվներ ջնջելը:
Facebook-ը պարբերաբար ջնջում է այն հաշիվները, որոնք խախտում են ընկերության կողմից հաստատված քաղաքականությունը: Դրա համար նա բազմիցս քննադատության է ենթարկվել առանձին երկրների իշխանությունների կողմից: Նման ամենաաղմկոտ դեպքը ԱՄՆ նախկին նախագահ Դոնալդ Թրամփի հաշիվների արգելափակումն էր այն բանից հետո, երբ հունվարի 6-ին նրա կողմնակիցները ներխուժեցին Կապիտոլիում:
